Қодиёнийлар: Қодиёний ва оиласининг инглизлар билан ҳамкорлиги (давоми)

0

Мустамлакачи давлатлар бирон мусулмон давлатни қўлга киритишидан қувонган қодиёнийлар буни байрам қилиб нишонлаши улар билан инглизлар ўртасида яқинлик ва ҳамкорлик борлигининг яна бир исботидир. Чунки улар Британия эгаллаган мамлакатларда қодиёнийлар учун эшиклар кенг очилишини яхши билишар эди. Ҳатто Британия кучлари Ироқни ишғол этганида қодиёнийлар намояндаларидан бири – Ғуломнинг ўғли бўлмиш Маҳмуд Аҳмад шундай деган: “Мусулмонлар бизни инглизлар билан ҳамкорлик қилишда айблашади, инглизларнинг ғалабасига хурсанд бўлганимиз учун бизга таъна тошини отишади. Бизга айтингларчи, нега хурсанд бўлмаслигимиз керак экан?! Ахир имомимиз (отаси Ғуломни назарда тутмоқда): “Мен Маҳдийман, Британия ҳукумати эса менинг қиличимдир” – демаганмиди?! Шундай экан, биз бу фатҳларга хурсанд бўлиб, Ироқ, Шом ва бутун ер юзида бу қиличнинг чақмоқдек ялтирашини кўришни истаймиз”[1]. Отаси бу гапни ўзини пайғамбар деб даъво қилишидан олдин айтган бўлса, ажаб эмас.

Британия ҳукумати Қуддусни босиб олганида шундай деган: “Биз Британиянинг ғалабалари учун Аллоҳ таолога беҳисоб шукр айтамиз. Хурсандчилигимизнинг боиси шуки, имомимиз (Ғулом Аҳмад) уларнинг ғалабасини сўраб дуо қилар ва жамоатини ҳам уларнинг ҳаққига дуо қилишга буюрар эди. Қолаверса, Британия биз учун олдин берк бўлган эшикларни очди. Буларнинг барчасига Британия давлати бошқа давлатларни ҳам қўл остига олгани сабаб бўлмоқда”[2].

Шайх Эҳсон Илоҳий нақл қилишича, қодиёнийларнинг “Ал-фазл” номли расмий журналида шундай дейилган: “Британия ҳукумати бизнинг қалқонимиз бўлиб, унинг ҳимоясида олға юрамиз. Агар бу қалқон йўқотилса, бизга отилган ўқлар оқибатида тилка-пора бўламиз. Шунинг учун ҳам биз улар билан бирлашдик, уларнинг ривожи ва тараққиёти бизнинг ривожимиз ва тараққиётимиз, уларнинг ҳалокати эса бизнинг ҳалокатимиз демакдир”[3].

Мирзо Ғуломнинг ўзи эса шундай дейди: “Агар ҳукумат қиличим (Британияни назарда тутмоқда) бўлмаганида, Исо кофирлар томонидан кўрган озорларни сизлар томонингиздан кўрган бўлардим. Шунинг учун бу ҳукуматга хушомад қилиб эмас, балки яхшиликларига шукр қилиб чинакам раҳмат айтамиз. Аллоҳга қасамки, бу ҳукумат соясида бугунги кунда ислом ҳукуматидан умид ҳам қилинмайдиган хотиржамликни топдик. Шунинг учун бизнинг назаримизда уларга жиҳод номи остида қилич кўтариш мумкин эмас. Уларга қарши уруш қилиш, бузғунчилик ва қаршилик қилиш барча мусулмонларга ҳаромдир. Сабаби улар бизга турли-туман яхшилик қилишган”[4].

Қодиёнийларнинг бу каби гапларини келтиришдан мақсадимиз уларнинг қанчалар хатарли бир тоифа эканини баён қилишдир. Баъзи мусулмонлар уларнинг ташқи қиёфасига қараб, ўзларини исломга даъват қилаётгандек кўрсатганларига алданиб, бу тоифани ҳам бошқа жамоатлар сингари мусулмон деб ўйлашади. Ҳар бир мусулмон шуни билиб олиши лозимки, қодиёнийлар қадами етган жойда мусулмонларга зарар беришган, инглизларга жосуслик қилиб, ислом номи билан мусулмонларга қарши курашиб келишган.

[1] “Ал-фазл” журнали, 7.12.1918.
[2] “Ал-фазл” журнали, 23.11.1918.
[3] “Ал-фазл” журнали, 19.10.1915.
[4] “Замийматул ваҳий” китоби, 50-бет.

Муҳаммад Ҳабибуллоҳ (Акбар Саматов): 1988 йил Самарқанд вилоятида таваллуд топган. Ўрта мактабни тугатганидан сўнг диний илм ўрганиш ниятида Тошкент шаҳридаги Кўкалдош мадрасасига ўқишга кирган. У ерда икки йил таълим олганидан сўнг араб тилини мукаммал ўрганиш мақсадида Миср Араб Республикасига бориб, у ердаги Ал-азҳар университетига ўқишга кирган ва университетнинг Исломий Шариат факултетини тугатган. Бошланғич ва асосий илмини шайх Содиқ Самарқандийдан олган. Шунингдек, Абу Исҳоқ Ҳувайний, Мустафо Адавий, Ториқ Эвазуллоҳ, Ваҳид Абдуссалом Болий, Ҳасан Ёсир каби шайхлардан таълим олган. IxlosOrg саҳифасининг асосчиларидан бири. 2013 йилдан буён Туркияда истиқомат қилиб, даъват ва диний таълим соҳаларида фаолият юритиб келмоқда.

Изоҳ қолдиринг