Умавийлар: Муовия розияллоҳу анҳу (4)

0

Хотини ва фарзандлари

1. Майсун бинти Баҳдал ибн Унайф

Майсун бинти Баҳдал камбағал оиладан бўлиб, оддий ҳаётга ўрганган ва Зомил ибн Абдулаълога турмушга чиққан эди. Зомилни ўз укаси ўлдириб қўйганидан кейин Муовия розияллоҳу анҳуга турмушга чиқди. Муовия розияллоҳу анҳу халифалик даврида ҳам Майсунни қаттиқ ҳурмат қилса-да, у ўзининг туғилиб ўсган қишлоғини қаттиқ қумсар эди. Бир куни қасрда ўтириб, эски жойлари ва киндик қони тўкилган қишлоғини эслаб йиғлади. Шунда Муовия розияллоҳу анҳунинг канизакларидан бири Майсунга: “Нега йиғлайсан, ахир?! Билқиснинг қасридек жойда турсанг?!” – деди. Шунда Майсун қаср ҳаётидан зериккани ҳамда ўзининг қишлоғини соғингани ҳақида шеър айтади. Майсун бу шеърида эрини қаттиққўл экани ва ўз қабиласидаги оддий саховатли инсон ундан яхши эканини айтиб ўтади. Муовия розияллоҳу анҳу унинг бу шеърини эшитиб: “Майсун шунча ҳурматимизга ҳам рози бўлмай, ахийри бизни олчоққа ўхшатибди-да!” – дейди ва уни талоқ қилади. Муовия розияллоҳу анҳу Майсунга қасрдаги барча нарсаларни бериб юборади ва уни ўз қишлоғига кузатиб қўяди.

Муовия розияллоҳу анҳу Майсундан икки фарзанд: бир ўғил ва бир қиз кўрган. Ўғлининг исми Язид, қизининг исми эса Амату Раббилмашориқ бўлган. Майсун Язидни ўзи билан бирга қишлоққа олиб кетган. Язид араб тилини чуқур билишининг сабаби ҳам шунда. Амату Раббилмашориқ эса ёшлигида вафот этган.

Бағдодий роҳимаҳуллоҳ “Хизонатул адаб” китобида ривоят қилишича, Муовия розияллоҳу анҳу Майсунни талоқ қилганида Майсун: “Хотининг бўлганимда хурсанд эмасдим, ажрашганимдан хафа эмасман” – деган экан.

2. Фохита бинти Қараза

Унинг тўлиқ исми Фохита бинти Қараза ибн Абдуамр ибн Навфал ибн Абдуманоф. Муовия розияллоҳу анҳу Фохитадан Абдураҳмон ва Абдуллоҳ исмли фарзандлар кўрган. Абдуллоҳ озғин ва бироз эсипастроқ, куняси Абулхайр бўлган. Абдураҳмон эса ёшлигида вафот этган.

3. Кануд бинти Қараза

Кануд Фохитанинг синглиси бўлади. Муовия розияллоҳу анҳу Фохитани талоқ қилганидан кейин синглиси Канудга уйланган. Муовия розияллоҳу анҳу Кипрни фатҳ қилганида Кануд унинг ёнида бўлган.

4. Ноила бинти Умора

Ноила Бани Калб қабиласидан бўлган. Муовия розияллоҳу анҳу уни талоқ қилган.

Қизлари

1) Рамла – Амр ибн Усмон ибн Аффонга турмушга чиққан;

2) Ҳинд – Абдуллоҳ ибн Омирга турмушга чиққан;

3) Ойша;

4) Отика;

5) Сафийя.

Муҳаммад Ҳабибуллоҳ (Акбар Саматов): 1988 йил Самарқанд вилоятида таваллуд топган. Ўрта мактабни тугатганидан сўнг диний илм ўрганиш ниятида Тошкент шаҳридаги Кўкалдош мадрасасига ўқишга кирган. У ерда икки йил таълим олганидан сўнг араб тилини мукаммал ўрганиш мақсадида Миср Араб Республикасига бориб, у ердаги Ал-азҳар университетига ўқишга кирган ва университетнинг Исломий Шариат факултетини тугатган. Бошланғич ва асосий илмини шайх Содиқ Самарқандийдан олган. Шунингдек, Абу Исҳоқ Ҳувайний, Мустафо Адавий, Ториқ Эвазуллоҳ, Ваҳид Абдуссалом Болий, Ҳасан Ёсир каби шайхлардан таълим олган. IxlosOrg саҳифасининг асосчиларидан бири. 2013 йилдан буён Туркияда истиқомат қилиб, даъват ва диний таълим соҳаларида фаолият юритиб келмоқда.

Изоҳ қолдиринг