Закот беришда унинг закот эканини айтиш шартми?

0

Савол:

Закотни беришда олувчига бу пул закот эканини айтиш шартми?

Жавоб:

Алҳамдулиллаҳ;

Агар закотни олувчи шахс закот олишга лойиқ экани маълум бўлса, унда берилаётган пул закот эканини айтиш шарт эмас. Баъзи уламолар айтиш яхши эмас дейишган. Бу ҳақда имом Нававий роҳимаҳуллоҳ шундай дейди: “Агар пулнинг эгаси ёки бошқаси закотни лойиқ инсонга бериб, унинг закот эканини айтмаса ва умуман ҳеч нарса демаса, бу закот дуруст бўлади. Мана шу фикр жумҳур қатъий айтган машҳур ва тўғри фикрдир” (“Ал-мажмуъ”, 6\233).

Бордию, олувчи шахс закот олишга лойиқ ёки нолойиқ экани номаълум бўлса ёхуд у закотга лойиқ эмаслиги аниқ бўлса, бундай ҳолатларда берилаётган пул закот эканини айтиш шарт бўлади, валлоҳу аълам.

Закотга кимлар лойиқ экани ҳақида тўлиқроқ маълумот олиш учун “Закот олишга кимлар ҳақли?” номли фатвога мурожаат қилинг.

Муҳаммад Ҳабибуллоҳ (Акбар Саматов): 1988 йил Самарқанд вилоятида таваллуд топган. Ўрта мактабни тугатганидан сўнг диний илм ўрганиш ниятида Тошкент шаҳридаги Кўкалдош мадрасасига ўқишга кирган. У ерда икки йил таълим олганидан сўнг араб тилини мукаммал ўрганиш мақсадида Миср Араб Республикасига бориб, у ердаги Ал-азҳар университетига ўқишга кирган ва университетнинг Исломий Шариат факултетини тугатган. Бошланғич ва асосий илмини шайх Содиқ Самарқандийдан олган. Шунингдек, Абу Исҳоқ Ҳувайний, Мустафо Адавий, Ториқ Эвазуллоҳ, Ваҳид Абдуссалом Болий, Ҳасан Ёсир каби шайхлардан таълим олган. IxlosOrg саҳифасининг асосчиларидан бири. 2013 йилдан буён Туркияда истиқомат қилиб, даъват ва диний таълим соҳаларида фаолият юритиб келмоқда.

Изоҳ қолдиринг