Бир ўртоғим Россияда ишлайди. У ўша ерда иккинчи аёлига уйланди. Бир йилдан ортиқ бирга яшашгач, хотини онамни кўриб келай деб юртимизга қайтиб келиб, эрига билдирмай бошқа эрга тегиб олибди. Бунинг ҳукми нима бўлади? Айтишича, хотини ҳомиладор ҳам бўлган.
Жавоб:
Алҳамдулиллаҳ.
Бировнинг никоҳидаги аёлга уйланиб бўлмайди. Аллоҳ таоло айтади: «Яна эрлик аёллар(га уйланиш ҳам ҳаром қилинди)» [Нисо: 24]. Борди-ю, шундай воқеа юз берса, бундай никоҳ ботил саналиб, улар ўртасини ажратиб юбориш вожиб бўлади. Агар аёл ва эркак бундай никоҳнинг жоиз эмаслиги ва ҳаромлигини била туриб қилишган бўлса, қаттиқ гуноҳкор бўлишади. Агар шундай никоҳ ортидан жинсий яқинлик қилган бўлсалар, зино қилган бўладилар. Бу ишлари учун тавба қилиб, Аллоҳдан истиғфор сўрашлари керак. Ҳатто аёл иккинчи эркакка турмушга чиққач ҳомиладорлиги аниқ бўлса ҳам туғилган бола биринчи эрига нисбат берилади. Эрнинг ўзи аёлини зинода айблаб, буни рад этиши бундан мустасно.
Эрлик аёл зинога қўл урса, шу қилмишининг ўзи биланоқ эр-хотин ўртасидаги никоҳ бузиладими-йўқми?
Рожиҳ фикрга кўра, мазкур ҳолатда никоҳ бузилмайди. Бироқ эр зинога қўл урган аёлини никоҳида қолдириши афзалми ёки талоқ қилганими?
Имом Аҳмад бундай аёлнинг жавобини беришни мустаҳаб санаб, шундай деганлар: «Бундай аёл эрининг тўшагини булғамаслиги, бировлардан бола орттириб, эрига нисбат бермаслигига кафолат йўқ»[1].
Албатта, бундай аёлни талоқ қилиш шарт бўлмай, балки мустаҳаб холос. Зинога қўл урган аёл эрининг никоҳида давом этиши тўғрисида Шавконий роҳимаҳуллоҳ шундай дейди: «Инсон зинога қўл урган хотинини никоҳида қолдириши жоиз. Бироқ у зинокор аёлга уйланиши ҳаромдир»[2]. Демак, эркак кишининг бошиданоқ зинокор аёлга уйланиши билан, уйлангач, зинога қадам қўйган аёли билан яшаши ўртасида фарқ бор. Зинокор аёлга уйланиш ҳаром бўлса, зино қилиб қўйган хотин билан никоҳда давом этиш жоиздир. Шундай бўлса-да, имом Аҳмад айтганларидек, бундай хотинни талоқ қилиш афзалдир.
Аёл талоқ қилингач уч ҳайз кўриш муддатича идда сақлаши керак. Ундан кейин хоҳласа биронтага турмушга чиқиши мумкин.
Шунга кўра, мазкур аёл ҳар қандай ҳолатда то шаръий эридан талоғини олиб, иддаси тугаб, янгидан никоҳ ўқитмагунча иккинчи эри билан яшаши жоиз эмас, валлоҳу аълам.
