Исломни қабул қилгим келяпти, бироқ айримлар шошилмасликни маслаҳат бермоқда

0

Савол:

Бир неча ой мобайнида Ислом дини ҳақида ўқиб-ўргандим, кейинги вақтларда Қуръон ҳам ўқияпман. Шаҳодат калималарини айтишга, Исломни қабул қилишга тайёрлигимни ич-ичимдан ҳис қилаяпман. Бироқ айрим мусулмон дўстларим бунга ишонқирамасдан қарашмоқда ва менга бу борада қатъий қарор олишга шошилмасликни маслаҳат беришмоқда. Лекин мен ўзимни бу муҳим қадамни ташлашга тайёрман деб ўйлайман. Илтимос, менга маслаҳат беринг, нима қилсам тўғри бўлади, Исломни эълон қилиш учун нима қилишим керак? Мен табиатан иккиланувчи одамман, бир қарорга келишим қийин бўлмоқда. Жавоб учун олдиндан ташаккур.

Жавоб:

Алҳамдулиллаҳ..

Аввало, сизнинг Исломга киришга тайёрлигингизни ифода этган саволингизни ўқиш бизга фараҳ бағишлаганини айтиб ўтишни истардим. Айрим дўстларингизнинг бу муҳим масалада шошилмаслик ва яхшироқ ўйлаб кўриш ҳақидаги маслаҳатларига келсак, бу тўғри маслаҳат эмас. Эҳтимол, улар сизни Исломни қабул қилганингиздан кейин яна диндан қайтиб, муртад бўлиб кетишингиздан хавфсираб, шундай дейишаётгандир. Бироқ, муҳтарам савол йўлловчи, ўлим кутилмаганда келиши ва исталган дақиқада ҳаёт билан видолашишимиз мумкин-ку, шундай эмасми?! Ажал ёшу қарини танлаб ўтирмайди-ку! Шундай экан, яхшиликка имкон қадар тезроқ шошилишингиз ва Исломни тезроқ қабул қилишингиз, ажал етса дунёдан мусулмон ҳолда ўтишингиз ўзингиз учун яхши эмасми?! Зотан, яхшиликка шошилган яхши. Қолаверса, Аллоҳга ҳамд бўлсинки, сиз Ислом ҳақида анча-мунча ўқиб ўрганибсиз, Қуръон ҳам ўқияпсиз экан. Кечиктиришдан фойда йўқ, ўзингизни ажру савобдан маҳрум қилманг, қанча тез Исломни қабул қилсангиз, шунча яхши.

Аллоҳга илтижо қилиб сўраймизки, Ўзи сизга ёрдам берсин, ишларингизни осон қилсин, қулфи дилингизни очсин, ҳақ устида саботли қилсин.

Шайх Муҳаммад Солиҳ Мунажжид

Манба: IslamQA

 

Изоҳ қолдиринг