Никоҳ кечаси одоблари

0

Кириш

Бисмиллаҳ, Аллоҳ таолога ҳамду санолар, Пайғамбаримиз Муҳаммад Мустафога салавоту саломлар бўлсин!

Оила жамиятнинг асосидир, оила ислоҳ бўлса жамият ислоҳ бўлади, оила бузилса, жамият бузилади. Шундан келиб чиққан ҳолда, янги қурилаётган оилалар давомли ва тотув бўлишини истаб, бугунги мақоламизда биз эр-хотин ўртасидаги илк муносабат, яъни никоҳ кечаси ҳақида сўз юритмоқчимиз. Ушбу мақолада никоҳ кечасига оид одоблар, ҳукмлар, ман қилинган ишларни қисқача баён қилиб ўтамиз. Никоҳ кечаси ҳар бир ёш йигит-қиз бошидан кечирадиган ҳолат бўлиб, бу унинг ҳаётида биринчи марта содир бўлаётган бўлади. Бинобарин, бу кечанинг одоблари, унда бажарилиши керак бўлган ёхуд ман қилинган ишлар тўғрисида келинда ҳам, куёвда ҳам деярли маълумот бўлмайди. Бу ҳақда бошқалардан маслаҳат сўраш, хусусан, бизнинг ўзбек халқида беҳаёлик саналади. Азиз ўқувчи, ушбу мақола ёрдамида мусулмон келин-куёвнинг никоҳ кечаси қай тарзда ўтиши кераклиги ҳақида тўлиқ маълумотга эга бўласиз, иншааллоҳ.


Никоҳ кечаси одоблари

1) Ният

Бу қутлуғ кечага қадам қўяётган ҳар бир инсон аввало шу иши билан номусини сақлашни, фақат ва фақат ҳалол йўллар билан шаҳватини қондиришни ўз олдига мақсад қилиб олиши керак. Расулуллоҳ соллаллоҳу алайҳи ва саллам: “Уч кишига Аллоҳ таоло ёрдам бериши тайин: Аллоҳ йўлида жиҳод қилганга, қарзини узиш мақсадида хўжайини билан шартлашган қулга ҳамда ҳаромдан сақланиш ниятида никоҳланган кишига” – деганлар (Аҳмад, Термизий ва Ибн Можа ривояти). Зеро, ҳаромдан тийилиш мақсадида хотинига яқинлик қилиш ҳам савобдир.

2) Безаниш

Келин-куёв никоҳ кечасига безаниб кириши ҳақида ортиқча гапириб ўтиришнинг ҳожати бўлмаса керак. Зеро, бунга бизнинг одатимизда қаттиқ эътибор берилади. Қўшимча сифатида шуни айтиб ўтишимиз керакки, бу кечага киришдан олдин оғиз ва қўлтиқ ҳиди каби жуфтини жиркантирадиган ҳидлардан тозаланиш зарур. Бугунги кунда бу нарсалар учун ишлатиладиган воситалар жуда ҳам сероб. Бироқ, безаниш асносида ҳаром ишларга қўл урмаслик керак. Масалан, аёлларнинг қош териши, соч улаши, баданига татуировка чиздириши, буларнинг барчаси ҳаром. Эркаклар эса чиройли кўриниш мақсадида соқолини қириб олиши ёхуд тилла тақинчоқлар тақиши мумкин эмас.

3) Келиннинг олдига кирганда ўқиладиган дуо

Келиннинг ҳузурига кирганда унинг пешонасига қўлни қўйиб: “Бисмиллаҳ, Аллоҳим, бу никоҳимизни муборак қил! Аллоҳим, Сендан аёлимдаги яхши хислат ва Сен унга ато этган яхши хулқларини сўрайман. Унинг ёмон сифатлари ва Сен унга берган ёмон хулқларидан Ўзингдан паноҳ тилайман” – деб дуо қилиши суннат.

“Кундалик зикрлар” номли мақолаларимизда айтиб ўтганимиздек, бу каби дуо ва зикрларнинг маъносини ўзлаштиргандан сўнг, арабча матнини айтиш мақсадга мувофиқ бўлади. Юқоридаги дуонинг арабча матни қуйидагича:

اللَّهُمَّ بَارِكْ لَنَا؛ اللَّهُمَّ إنِّي أسْألُكَ خَيْرَهَا، وخَيْرَ مَا جَبَلتَها عَلَيْهِ، وأعُوْذُ بِكَ مِنْ شَرِّهَا، وشَرِّ مَا جَبَلْتَهَا عَلَيْهِ

Бу матннинг ўқилиши қуйидагича: “Аллоҳумма баарик ланаа. Аллоҳамма инний асъалука хойроҳаа ва хойро маа жабалтаҳаа алайҳи, ва ауузу бика мин шарриҳаа ва шарри маа жабалтаҳаа алайҳи”.

4) Аёлга юмшоқ муносабатда бўлиш

Никоҳ кечаси келин аёллик оламига, куёв эса эркаклик оламига қадам қўядиган биринчи кечадир. Шунинг учун бу кеча бошқаларидан фарқли ўлароқ, меҳр-муҳаббатга тўлиб ўтмоғи лозим. Олдин бегона эркак билан бир лаҳза ҳам ёлғиз қолмаган келин, куёвнинг унга бўлган туйғусини ҳис қилиши учун аввало қалбидаги қўрқинчдан халос бўлиши керак. Бунинг учун куёв унга нисбатан ниҳоятда мулойим бўлиши, уни қўрқитмаслиги, токи ўзини босиб, ҳаяжони кетмагунича ёқимли гаплар билан, ҳазил билан унинг ҳаяжонини кетказиши ҳамда яқинликка асло шошилмаслиги керак. Акс ҳолда, келинга жисмоний зарар бериш оқибатида қавму қариндошлар олдида ўзини ҳам, келинни ҳам ноқулай вазиятга қўйиши мумкин.

Асмо бинти Язид шундай дейди: “Мен Расулуллоҳ соллаллоҳу алайҳи ва саллам киришлари учун Ойшани безантирдим. Сўнг Расулуллоҳ соллаллоҳу алайҳи ва салламнинг ҳузурига келиб, Ойшани кўришлари учун у зотни чақирдим. У зот Ойшанинг ёнига келдилар. Бир қадаҳ сут олиб келиб, ундан ичдилар-да, сўнг Ойшага узатдилар. У уялиб, бошини эгди. Шунда мен уни туртиб: “Расулуллоҳ соллаллоҳу алайҳи ва салламнинг қўлларидан ол” – дедим. Ойша қадаҳни олиб, сутдан бироз ичди. Сўнг Расулуллоҳ соллаллоҳу алайҳи ва саллам унга: “Дугоналарингизга беринг– дедилар” (Аҳмад (27044) ривояти). Мазкур ҳадисда Расулуллоҳ соллаллоҳу алайҳи ва саллам Ойша онамизнинг ҳаяжонини босиш учун тутган бу йўллари бизга катта дарс бўлиши керак.

5) Икки ракаат нафл ўқиш

Бу кеча келин-куёв биргаликда икки ракаат нафл ўқишлари мақсадга мувофиқдир. Бунга қуйидаги ривоят далил бўлади. Абу Усайднинг мавлоси (озод қилинган қули) Абу Саид айтади: “Мен қуллик давримда уйландим ва тўйга Расулуллоҳ соллаллоҳу алайҳи ва саллам саҳобаларидан Ибн Масъуд, Абу Зар ва Ҳузайфани таклиф қилдим. Уларга: “Менга келин-куёв одобларини ўргатинглар”, дедим. Улар шундай деб жавоб беришди: “Аёлинг олдига кирсанг икки ракаат намоз ўқи, сўнг Аллоҳ таолодан аёлингнинг яхшилигини сўра ва ёмонлигидан паноҳ тила. Қолгани ўзларингга ҳавола[1].

Шақиқ ибн Салама роҳимаҳуллоҳнинг қуйидаги ривояти ҳам бунга бир далилдир: “Абу Жарир номли киши Абдуллоҳ ибн Масъуд розияллоҳу анҳунинг ҳузурига келиб: “Мен  ёш қизга уйландим. Мени ёмон кўриб, қолишидан қўрқаман”, деди. Ибн Масъуд розияллоҳу анҳу шундай жавоб берди: “Меҳр-муҳаббат Аллоҳдан, совуқчилик ва нафрат шайтондандир. Шайтон сизларга Аллоҳ ҳалол қилган нарсани ёмон кўрсатишни хоҳлайди. Агар (биринчи кечада) аёлинг ҳузурингга кирса, уни ортингда икки ракаат намоз ўқишга буюр[2].

6) Яқинлик қилишдан олдин ўқиладиган дуо

Имом Бухорий Ибн Аббос розияллоҳу анҳумодан ривоят қилган ҳадисда Расулуллоҳ соллаллоҳу алайҳи ва саллам: “Агар бирортангиз аёлига яқинлик қилмоқчи бўлганида: “Бисмиллаҳ, Аллоҳим биздан ва Сен бизга ризқ қилиб берадиган фарзандимиздан шайтонни йироқ қил” – деса, (ўша яқинлик асносида) уларга фарзанд берилса, унга шайтон асло зарар бера олмайди” – деганлар.

Мазкур дуонинг арабча матни қуйидагича:

بِاسْمِ اللَّهِ اللَّهُمَّ جَنِّبْنَا الشَّيْطَانَ وَجَنِّبْ الشَّيْطَانَ مَا رَزَقْتَنَا

Бу матннинг ўқилиши қуйидагича: “Бисмиллаҳ, Аллоҳумма жаннибнаш шайтон ва жаннибиш шайтона маа розақтанаа”.


Яқинлик қилишга оид масалалар

1) Жинсий яқинлик турлари

Эр-хотин ўртасидаги жинсий муносабатни ҳалол ва ҳаром бўлган икки кўринишга ажратиш бўлиш мумкин.

А) Ҳалол кўринишлари

Эр ўз хотинига ҳар қандай кўринишда яқинлик қилиши жоиз. Бироқ яқинлик аёлнинг қайси тарафидан бўлишидан қатъий назар, жинсий аъзосига бўлиши шарт. Бу ҳақда тўлиқроқ маълумот олиш учун “Турли кўринишларда жинсий яқинлик қилиш жоизми?” номли фатвомизга мурожаат қилинг.

Янги турмуш қураётган ёшларда кўп учрайдиган саволлардан бири – эр-хотин бир-бирининг авратини ушлаши жоизми? Ҳа, эр-хотин бир-бирининг авратини ушлаб, эркалаши жоиз. Шунингдек, яқинлик асносида ёқимли сўз айтиш ҳам лаззатланишнинг бир тури саналади. Бироқ ҳаром ва фаҳш сўзлардан четланиш лозим.

Б) Ҳаром кўринишлари

Аёл кишининг орқасига яқинлик қилиш ёки рўза вақтида, эҳромдалигида ва яна узрли ҳолатида яқинлик қилиш ҳаром қилинган. Бу ҳақда батафсил маълумот олиш учун “Никоҳ кечаси келин узрли бўлса нима қилиш керак?” номли фатвога мурожаат қилинг. Узрли ҳолатдаги аёлга фақатгина яқинлик қилиш ҳаром, лекин бундан бошқа ишларни қилиш жоиз. Бу ҳақда тўлиқроқ маълумот олиш учун “Узрли аёл эрини қандай қондиради?” номли фатвомизга мурожаат қилинг.

2) Икки яқинлик ўртасида таҳорат қилиш

Инсон аёлига бир марта яқинлик қилганидан сўнг, иккинчи марта яқинлик қилмоқчи бўлса, ўртада таҳорат олиши суннат. Бу ҳақда Расулуллоҳ соллаллоҳу алайҳи ва саллам: “Агар биронтангиз аҳлига яқинлик қилса, сўнг қайта яқинлик қилмоқчи бўлса, ўртада намозга таҳорат олганидек таҳорат олсин” – деганлар (Муслим ривояти). Абу Нуайм ривоятида эса: “Чунки бу уни тетиклаштиради” – деган қўшимчаси ҳам бор.

Агар таҳорат ўрнига ғусл қилиб олса, нур устига нур бўлади. Бу ҳақда Абу Рофеъ розияллоҳу анҳу шундай дейди: “Бир куни Расулуллоҳ соллаллоҳу алайҳи ва саллам аёлларини айланиб чиқдилар. Ҳар бириникида ғусл қилар эдилар. Мен: “Ё Расулуллоҳ, биратўласи ҳаммаси учун бир марта ғусл қилиб қўйсангиз бўлмайдими?!” – деб сўрагандим, у зот: “Бўлади, лекин шуниси янада яхшироқ ва покизароқ” – деб жавоб бердилар” Абу Довуд ривояти). Расулуллоҳ соллаллоҳу алайҳи ва саллам Абу Рофеъ розияллоҳу анҳуни ғусл қилишга буюрмадилар. Демак, бу ҳадис жунуб инсонни кўриб қолганлар ҳам ғусл қилиши керак, деган гапнинг асоссиз эканига далил бўлади.

3) Жунуб ҳолатда ухлаш

Жунуб ҳолатида ғуслсиз ухламоқчи бўлган киши уйқудан олдин таҳорат олиши мустаҳаб. Умар розияллоҳу анҳу Расулуллоҳ соллаллоҳу алайҳи ва салламдан: “Жунублик ҳолда ухлашимиз мумкинми?” – деб сўраганида у зот: “Ҳа, таҳорат олса ухлайверади” – деб жавоб берганлар. Бошқа ривоятларда “агар хоҳласа” деган қўшимчаси ҳам бор. Шундан билиб оламизки, бу таҳорат мустаҳаб, жунуб ҳолатида таҳорат қилмасдан ухлаган киши гуноҳкор бўлмас экан.

Шунингдек, баъзи одамлар жунуб инсонга нажосатдек қарашади. Ҳатто келини жунуб ҳолатида пиширган овқатларни емайдиган қайноналар ҳам йўқ эмас. Бу нотўғри тушунча. Тўғри, жунуб инсон ғусл қилмагунича баъзи бир ишларни қилиши мумкин эмас. Лекин бу унинг нажосат бўлганига далолат қилмайди. Худди мана шу тушунча Абу Ҳурайра розияллоҳу анҳуда ҳам бўлган. У жунуб ҳолатида Расулуллоҳ соллаллоҳу алайҳи ва салламнинг ҳузурларида ўтиришни истамагани учун чиқиб кетиб, ғусл қилиб келган. Расулуллоҳ соллаллоҳу алайҳи ва саллам нима сабабдан ҳузурларидан кетиб қолганини сўраганларида Абу Ҳурайра розияллоҳу анҳу: “Жунуб эдим, сизнинг олдингизга бу ҳолатимда ўтиришни истамадим” – деганида Расулуллоҳ соллаллоҳу алайҳи ва саллам: “Субҳаналлоҳ! Абу Ҳурайра, мўмин киши ҳеч қачон нажас бўлмайди” – деб, Абу Ҳурайра розияллоҳу анҳунинг бу тушунчасини тўғрилаб қўйганлар.

4) Қандай ҳолатларда ғусл қилиш вожиб бўлади

Икки ҳолатда эр-хотин ғусл қилиши вожиб бўлади:

А) Эрнинг олати аёллик аъзосига кирганида. Бундай ҳолатда эркакнинг шаҳвати чиққани ёки чиқмагани муҳим эмас. Олат киришининг ўзи билан ғусл қилиш вожиб бўлади. Бунга “Авратлар туташганда ғусл вожиб бўлади” ҳадиси далил бўлади (Муслим ривояти). Олат кириши деганда олатнинг боши кўринмайдиган даражада кириши назарда тутилган. Ғусл вожиб бўлиши учун шунинг ўзи етарли, тўлиқ кириши шарт эмас.

Б) Олат кирмаган тақдирда ҳам, эркакнинг шаҳвати чиқса, унда ҳам ғусл қилиш вожиб бўлади. Бунга имом Муслим ривоят қилган “Шаҳват чиқса ғусл вожиб бўлади” ҳадиси далил бўлади.

Эслатма:

Шаҳват чиқиши деганда маний, яъни эркакнинг олатидан шаҳват билан чиқадиган қуюқ оқ суюқлик назарда тутилган. Маний одатда жинсий аъзодан отилиб чиқади ва ортидан танада бўшашиш юз беради. Манийнинг хамир ҳидига ўхшаш ҳиди мавжуд. Аёлдан чиқадиган маний, эркакникидан фарқли ўлароқ, сарғиш ва суюқ бўлади. Тўғрироқ фикрга кўра, маний нажосат эмас, яъни нопок ҳисобланмайди.

Эркакнинг олатидан чиқадиган бошқа бир суюқлик ҳам бор. У араб тилида мазий деб аталади. Мазий – жинсий яқинлик тўғрисида хаёл қилган пайтда ёки жинсий яқинлик олдидан чиқадиган шаффоф шилимшиқ суюқлик. Мазий манийдан фарқли ўлароқ, инсон авратидан отилмай чиқади ҳамда унинг чиқиши билан танада бўшашиш юзага келмайди. Эҳтимол, инсон унинг чиққанлигини сезмаслиги ҳам мумкин. Мазий ҳар икки жинсдан – эркакдан ҳам, аёлдан ҳам чиқиши мумкин. Мазий чиқиши билан ғусл қилиш вожиб бўлмайди. Мазий нажосат бўлиб, баданга ёки кийимга теккан тақдирда шу аъзо ёки кийимни ювиб ташлаш керак.

5) Хотин билан ўйнашиш

Эркак киши аёли билан ўйин-кулгу қилиб ҳазиллашиши мақтовга лойиқ хислатдир. Баъзи инсонлар хотинга жиддий муомала қилишни ҳақиқий эркаклик деб ҳисоблашади. Бу жуда ҳам нотўғри тушунча. Чунки Жобир розияллоҳу анҳу ёши катта бева аёлга уйланганида Расулуллоҳ соллаллоҳу алайҳи ва саллам унга: “Сен билан ўйин-кулгу қиладиган бокирага уйланганингда бўлмасмиди?!” – деганлар (Бухорий ва Муслим ривояти). Демак, эр-хотин ўртасида мана шундай ўйин-кулгулар бўлиб турсагина эр-хотинлик риштаси мустаҳкам, ўртадаги ҳаёт фаровон бўлади. Акс ҳолда, эр-хотин ўртасидаги илиқлик рисоладагидек бўлмагани боис, арзимас сабаблар туфайли ҳаёт бузилиб кетиши ҳеч гап эмас. Шунингдек, эр жинсий яқинликдан олдин, хусусан биринчи кечада аёлини қучиб-ўпиш каби ишлар билан ундаги истакни янада орттириши керак. Зеро, аёлнинг жинсий яқинликдан оладиган лаззати эркакникидан фарқли ўлароқ, яқинликдан олдинги мана шундай ишларнинг қанчалик мукаммал бажарилишига боғлиқ. Расулуллоҳ соллаллоҳу алайҳи ва салламнинг ҳаётларига назар соладиган бўлсак, тўшакдан бошқа ҳолатларда ҳам аёлларини ўпиб, эркалатиб турганларига гувоҳ бўламиз.

6) Сақланиш

Эркак киши азл қилиши, яъни шаҳватини ташқарига тўкиши жоиз. Бунга Жобир розияллоҳу анҳунинг: “Биз, Қуръон нозил бўлиб турган вақтда сақланардик” – деган сўзи далил бўлади. Шундай бўлса-да, бу ишдан сақланиш афзал. Ана шунда жинсий яқинлик аёл учун ҳам, эркак учун ҳам етарли даражада мароқли бўлади. Бу ҳақда тўлиқроқ маълумот олиш учун “Фарзанд кўпайтирмаслик мақсадида сақланиш жоизми?” номли фатвомизга мурожаат қилишингиз мумкин.

7) Бирга чўмилиш

Эр-хотин бирга битта ҳаммомда чўмилишлари жоиз. Бунга Ойша розияллоҳу анҳонинг: “Мен Расулуллоҳ соллаллоҳу алайҳи ва саллам билан бирга ўртамизда турадиган битта идишдан сув олиб чўмилардим. Идишдан бирма-бир қўлимиз билан сув олардик. Расулуллоҳ соллаллоҳу алайҳи ва саллам мендан тез чўмилар, мен эса: “Менга ҳам сув қолдиринг, менга ҳам сув қолдиринг” – дер эдим. Биз иккаламиз ҳам жунуб бўлардик” – деган гаплари далил бўлади (Бухорий ривояти). Мазкур ҳадис эр-хотин ялонғоч ҳолатда бир-бирининг авратига қараши жоиз эканига ҳам далил бўлади. Аёлининг авратига қараган кишининг боласи ғилай туғилади, деган гап асоссиздир.


Куёвга маслаҳатлар

Азиз биродар, никоҳ кечасига қадам қўяр экансиз, биринчи навбатда кўнглингизни хотиржам қилинг. Унутманг, бу кеча сиз истаганингиздек ўтади, атрофингиздагилар истаганидек эмас. Бунинг учун сизга қуйида бир неча маслаҳатлар бериб ўтамиз.

  • Танмаҳрамингиз ва турмуш ўртоғингиз сиздан кўра қаттиқ ҳаяжонда. Сиз ўзингизни қўлга олишга қийналаётган бир вақтда ундан буни талаб қилманг. Бинобарин, сиз ёки у тарафидан бирор хато иш ёки ноўрин гап содир бўлиши табиий ҳол. Шунинг учун рафиқангиз томонидан бўладиган бу каби хатоларга бефарқ бўлинг, уни маъзур тутинг;

  • Одатда бу кечага қадам қўйишингизда сизга қариндошларингиз ёки турмуш қурган ўртоқларингиз томонидан турли хил маслаҳат ва йўлланмалар берилади. Буларнинг барчасидан керакли фойдани олинг, лекин шуни унутманг, улар ўз тажрибаларидан келиб чиқиб маслаҳат бермоқдалар. Ҳар бир инсоннинг биринчи кечаси бошқаларникига ўхшамайди. Сизнинг бу кечангиз ҳам айнан улар айтганидек ўтиши шарт эмас;

  • Асло ва асло жуфти ҳалолингиз ҳузурига кирибоқ, унга қўпол муомала қилманг. Унга қўлдан келганича юмшоқ ва мулойим муносабатда бўлинг. Унутманг, мулойимлик ҳар бир ишда мақтовга лойиқдир;

  • Инсон ҳаётидаги биринчи жинсий алоқа инсон ўзини руҳан тайёрлаб, қалби хотиржам бўлиб, эр-хотин ўртасида ширин суҳбатлар бўлиб ўтганидан сўнг бўлса, ҳаётингизнинг бир умр унутилмайдиган бир лаҳзасига айланади. Шунинг учун аёлингиз жинсий яқинликка ҳам руҳан, ҳам жисмонан ҳозиру-нозир эканини ҳис қилмагунингизча яқинлик қилишга шошилманг. Рафиқангиз балки шу кечанинг ўзида бунга тайёр бўлар, балки бир неча кундан сўнг. Шунинг учун асло ва асло шошилманг. Шариатда биринчи кунидаёқ яқинлик қилиш шарт ёки афзал деган гап йўқ;

  • Унутманг, агар биринчи яқинлик, аёл руҳан тайёр бўлмаса-да, “эркак”лигингизни кўрсатиб қўйиш учун зўрлаш ва куч ишлатиш каби қабиҳ суратда кечса, бу воқеа аёл хотирасига энг хунук ҳолат бўлиб муҳрланади. Аёлнинг ҳис-туйғуларини инобатга олмайдиган, бу каби “эркак”лик асосида бошланган муносабатлар узоққа бормайди;

  • Бу кеча рафиқангиз сиздан табассум билан боқиш, ҳазил, мулойимлик билан қучоқлаш каби ишларни кутади. Уни бундай туйғулардан маҳрум этманг;

  • Дарҳол жинсий яқинлик қилишга шошилманг, сабр қилинг. Кўз, лаб, бурун, қулоқ каби ҳар бир аъзоларга ўз ҳаққини беринг;

  • Ёрингизда жинсий яқинликка бўлган истакни орттиринг. Токи аёлингиз тўлиқлигича таслим бўлсин. Унинг кўнмаслиги ич-ичидан истаса-да, ҳаё қилганидан тортинаётгани сабабли бўлса, унда бироз ёрдамлашишингизнинг зарари йўқ;

Имкон бўлса, тўйдан кейинги бир неча кунларингизни аёлингиз билан холи ва тинч жойда ўтказишингиз мақсадга мувофиқ бўлади. Бу ўртангизда бир-бирларингизга бўлган меҳр-муҳаббат ошишига ҳамда бир-бирингизни тушуниб олишингизга янада ёрдам беради. Аллоҳ таоло бахтли ҳаёт ва солиҳ фарзандлар насиб этсин!


Келинга маслаҳатлар

  • Бу кечани ваҳимали қилиб тасвирлаётганларнинг гапига эътибор берманг. Улар ўзларининг биринчи кечаларини муваффақиятли ўтказа олмаган бўлсалар, сиз ҳам шундай ўтказишингиз керак эмас;

  • Сиз учун қоронғу бўлган мавзуларда маълумот олиш учун интернет ёки журналлардаги беҳаё ва одоб-ахлоқдан йироқ маслаҳатларга қулоқ солманг. Кўнглингиз хотиржам бўлиши учун ўзингиз ишонган ва қалбингиз таскин топадиган яқинларингиздан маслаҳат сўранг. Ана шунда ноқулай вазиятда қолмайсиз. Зеро, бу кечанинг сиз учун ҳам, турмуш ўртоғингиз учун ҳам аҳамияти жуда катта;

  • Ёрингиз учун безанинг, атир-упа сепинг, руҳан тайёрланинг. Лекин қош териш, соч улаш каби ҳаром ишлардан йироқ туринг. Унутманг, ҳаром билан бошланган ишда барака бўлмайди;

  • Куёвингиз киргунига қадар чимилдиқда ёлғиз ўтирманг. Бу вақтда ёнингизда онангиз ёки қайнонангиз бўлса, ичингизда қўрқув пайдо бўлмайди;

  • Хўжайинингиз ортидан икки ракаат намоз ўқинг. Бу сиз учун бир эслатма бўлади, турмушдан асосий мақсад жинсий лаззатланиш эмас, диний вазифани бажаришдир. Никоҳ сизнинг номусингизни сақлашингизга кўмак бўлади. Никоҳ сабабли сиз исломга фойдаси тегадиган фарзандларни етиштириш мартабасига эришасиз;

  • Тўғри, ҳаё иймоннинг бир бўлаги. Лекин ҳаё маромидан ошиб кетмаслиги керак, акс ҳолда, турмуш ўртоғингизни ўзингиздан нафратлантириб қўясиз. У билан муомала қилишда айтаётган сўзларингизга диққатли бўлинг. Унинг эркаклик ғурурига тегадиган гапларни асло гапирманг.


Шариатга хилоф урф-одатлар

Юқорида никоҳ кечасига оид одобларни айтиб ўтдик. Бундан бошқа одатлар бўлса, шариатга хилоф келмайдиганларига амал қилишнинг зарари йўқ. Бироқ чимилдиққа киришдан олдин келин-куёв олов атрофида айланиши, ўзлари билан бирга бир идишда ширин сув олиб кириб, уни ичишдан олдин яхши ниятларни айтиш ёки ойна олиб кириб, унга қараб тилак билдириш, эр-хотин муносабатлари янгалар томонидан кузатиб турилиши, келиннинг бокиралигини ҳаммага эълон қилиш каби юртимизда кенг тус олган урф-одатларнинг барчаси шариатга зид амаллар бўлиб, буларнинг биронтасига амал қилинмайди.

Шунингдек, никоҳ кечасидан сўнг бу кеча қандай ўтганини бошқаларга айтиш катта гуноҳ бўлиши билан бирга эр-хотин ўртасидаги сирни фош қилиш, турмуш ўртоққа нисбатан хиёнат қилишнинг бир кўринишидир. Асмо бинти Язид шундай дейди: “Саҳобалар ўтиришганида Расулуллоҳ соллаллоҳу алайҳи ва саллам: “Оиласи билан бўлган муносабатни бошқаларга айтадиган эркаклар ҳам борми? Эри билан бўлган муносабатини фош қиладиган аёллар ҳам борми?” – дедилар. Одамлар жим бўлиб қолишди. Шунда мен: “Ҳа, Аллоҳга қасам, аёллар ҳам, эркаклар ҳам шундай қилишади” – дедим. Расулуллоҳ соллаллоҳу алайҳи ва саллам: “Ундай қилманглар. Бу ишни қилган киши кўчада урғочисини кўриб қолиб, одамлар кўз ўнгида у билан яқинлик қилган шайтонга ўхшайди” – дедилар” (Имом Аҳмад ривоят қилган). Шуни унутмайлик, ўзимиз сир тута олмай бошқаларга сир тутишини сўраб айтган гапларимиз асло сирлигича қолмайди. Чунки сиз ўзингизга яқин олиб, сирингизни айтган кишингизнинг ҳам ўз яқини бор. Жуфти ҳалолингиз билан бўлиб ўтган ишлар одамлар ўртасида тарқалганидан сўнг улар сизларга қандай кўз билан қарашларини бир ўйлаб кўринг, ана шунда Расулуллоҳ соллаллоҳу алайҳи ва саллам бу разил ишни қилган кимсани шайтонга ўхшатганлари бежиз эмаслигини янада чуқурроқ тушуниб етасиз.

Оиладек жамиятнинг муқаддас бир бўлагини турли хил ножўя ишлар билан эмас, шариатга тўғри келадиган суннатлар билан бошлаш керак. Аллоҳ таоло барча ёшларимизга тинч-тотув оила ва бахт-саодат насиб этсин, ислом ва мусулмонлар фойдасига хизмат қиладиган фарзандларни тарбиялаш бахтига муяссар айласин!

[1] Ибн Абу Шайба (“Мусаннаф”: 3/401) ва Абдураззоқ (“Мусаннаф”: 6/191) ривоят қилишган.

[2] Ибн Абу Шайба (“Мусаннаф”: 3/401) ва Абдураззоқ (“Мусаннаф”: 6/191) ривоят қилишган

Муҳаммад Ҳабибуллоҳ (Акбар Саматов): 1988 йил Самарқанд вилоятида таваллуд топган. Ўрта мактабни тугатганидан сўнг диний илм ўрганиш ниятида Тошкент шаҳридаги Кўкалдош мадрасасига ўқишга кирган. У ерда икки йил таълим олганидан сўнг араб тилини мукаммал ўрганиш мақсадида Миср Араб Республикасига бориб, у ердаги Ал-азҳар университетига ўқишга кирган ва университетнинг Исломий Шариат факултетини тугатган. Бошланғич ва асосий илмини шайх Содиқ Самарқандийдан олган. Шунингдек, Абу Исҳоқ Ҳувайний, Мустафо Адавий, Ториқ Эвазуллоҳ, Ваҳид Абдуссалом Болий, Ҳасан Ёсир каби шайхлардан таълим олган. IxlosOrg саҳифасининг асосчиларидан бири. 2013 йилдан буён Туркияда истиқомат қилиб, даъват ва диний таълим соҳаларида фаолият юритиб келмоқда.

Изоҳ қолдиринг