Жамоавий зикрнинг зарарлари

0

Жамоавий зикрлар жумладан қуйидаги зарарларга олиб боради:

Биринчидан: Жамоавий тарзда зикр қилиш Набий соллаллоҳу алайҳи ва саллам ва у зотнинг саҳобалари тутган йўлга зид бўлиб, бу борада улардан бирор далил нақл қилинмаган. Шак-шубҳа йўқки, Набий соллаллоҳу алайҳи ва саллам ва улуғ саҳобаларнинг йўлларига хилоф бўлган иш бидъат ва залолат ҳисобланади. Агар у яхши иш бўлганида, Расулуллоҳ соллаллоҳу алайҳи ва саллам уни қилган, у зотга саҳобалари эргашган ва албатта, бу иш улардан нақл қилинган бўлар эди. Модомики бу иш улардан нақл қилинмаган экан, демак, улар буни қилмаганлар. Уларнинг замонида диндан бўлмаган ишлар бугун ҳам диндан бўлмайди.

Иккинчидан: Жамоавий тарзда зикр қилишда шариат буюрган вазминлик ва салобатдан чиқиш бор. Чунки жамоавий зикр инсоннинг тебранишига, сўнг рақс ва шу каби ишларга қадам қўйишига сабаб бўлиши мумкин. Бу эса асло жоиз эмас. Аксинча, у Аллоҳ таолонинг зикрида вожиб бўлган салобатга зид бўлиб, сўфий тариқат аҳлининг бу бобдаги ҳолатлари кўпчиликка маълумдир.

Учинчидан: Масжидда бажарилган жамоавий зикрлар намозхонларга ва Қуръон тиловат қилувчиларга халақит беради. Шубҳа йўқки, жамоавий зикрга рухсат берувчилар масжидларни жамоавий зикр учун тўпланиладиган энг улуғ маконлардан санашади.

Тўртинчидан: Зикр қилувчилар тарафидан кўпинча оятларни узиб қўйиш, оятларга ёки тиловат аҳкомларига ёки зикрларга путур етказиш ҳолати учрайди. Масалан, улардан бирларининг нафаси узилиб қолиб, оят ёки зикрнинг бир қисмини ўқиёлмай қолади. Шунда жамоат ундан ўзиб кетганини кўради ва уларга етиб олиш учун қолиб кетган оятни ташлаб кетишга мажбур бўлади. Шунингдек, баъзи зикр қилувчилар Қуръонни тажвид аҳкомларига риоя қилмай ўқишади. Бу аҳкомларни яхши биладиганлар жамоавий зикр асносида кўпчиликдан ажралиб қолмаслик ёки қарама-қаршилик ҳосил бўлмаслиги учун улар қандай ўқисалар, шундай ўқишга мажбур бўладилар.

Бешинчидан: Жамоавий зикр қилиш черковларда йиғилиб, жўр бўлиб тиловат ва диний қўшиқлар айтадиган насронийларнинг ишларига ўхшаб қолади. Ҳолбуки, шариатимиз дин ишларида аҳли китобларга ўхшашдан қаттиқ қайтарган. Бинобарин, бу, жамоавий тарзда зикр қилиш жоиз эмаслигига далолат қилади.

Олтинчидан: Жамоавий зикрга эшик очиш ҳар бир тоифа муайян шайхнинг этагини тутиб олиб, гарчи бидъат зикрлар бўлса-да, у айтган зикр ва гапларга эргашишига олиб боради. Оқибатда, кун сайин ушбу тариқатлар арбоблари ўртасидаги масофа узоқлашиб бораверади. Зеро, суннат бирлашишга, бидъат эса тарқоқликка олиб боради.

Еттинчидан: Жамоавий зикрга одатланиш баъзи жоҳил ва оми кимсаларнинг зикр қилиш учун ўзига шерик тополмай қолган пайтларида жамоавий зикрга одатланиб, ундан бошқасига ўрганолмай қолганлари сабабли Аллоҳнинг зикридан узилиб қолишларига олиб бориши мумкин.

Шубҳасиз, жамоавий зикрнинг бундан бошқа зарарлари ҳам бор бўлиб, юқорида келтирганларимиз етарли, деб ўйлаймиз.

Зубайр Исмоил 1993 йил Андижон вилоятида таваллуд топган. 2012 йил Мадинаи Мунавварадаги Ислом Университетига ўқишга кириб, 2018 йил университетнинг Араб Тили факултетини тамомлаган.

Изоҳ қолдиринг