Таҳорат сўзи араб тили луғатида “кирлардан тозаланиш ва покланиш” деган маънони англатади.
Шариатда эса “таҳоратсизликнинг йўқолиши ва нажосатларнинг кетиши” назарда тутилади.
“Таҳоратсизлик” – муайян ибодатлардан ман қиладиган сабаб юзага чиққанида баданда пайдо бўладиган маънавий ҳолат. Таҳоратсизлик икки қисмдан иборат: таҳорат олишни вожиб қиладиган кичик таҳоратсизлик ва ғуслни вожиб қиладиган катта таҳоратсизлик. Таҳоратсизлик таҳорат ва ғусл ёки муайян ҳолатларда иккисининг ўрнини босадиган таяммум билан кеткизилади.
“Нажосат” – ибодатни соғлом бажарилишидан тўсадиган жирканч нарсалар. Нажосат у теккан нарсани поклаш орқали кетказилади.
Таҳоратга оид аҳкомларни сувга тегишли бўлган ҳукмларни баён қилиш билан бошлаймиз.