Саҳобий бўлинг: Нодир авлод (11)

0

Саҳобалар тириклик чоғларидаёқ жаннатийлик башорати олганлари

Тўртинчидан: Набий соллаллоҳу алайҳи ва салламнинг саҳобаларига хос бўлган яна бир нарса: улар тириклик чоғларидаёқ жаннатийлик башоратини олган эдилар. Саҳобий ерда юрар экан, у аниқ жаннат аҳлидан эканини билиб турар эди. У шундан сўнг қандай қилиб дунё ҳаётига сабр қилади?!

Бу фақатгина жаннат хушхабари берилган ўнта саҳоба: Абу Бакр, Умар, Усмон, Али, Зубайр, Саъд ибн Абу Ваққос, Абдураҳмон ибн Авф, Талҳа ибн Убайдуллоҳ, Абу Убайда ва Саид ибн Зайдга тегишли эмас, балки саҳобаларнинг кўплари ҳали ҳаётлик чоғларида жаннат башоратини олган эдилар.

«Саҳиҳул Бухорий»да Абу Ҳурайра розияллоҳу анҳудан ривоят қилинган ҳадисда келади: Набий соллаллоҳу алайҳи ва саллам бомдод намозида Билол розияллоҳу анҳуга: «Эй Билол, Исломда қилган энг умидли амалинг ҳақида менга сўзлаб бер. Дарҳақиқат, мен жаннатда шиппагингнинг овозини (яъни қадам товушингни) эшитдим», дедилар. Билол айтди: «Мен учун энг умидли бўлган амалим шуки, қай вақт бўлмасин, тундами ёки кундузда, таҳорат олиб покланганимдан сўнг, шу таҳоратим билан қодир бўлганимча намоз ўқийман»[1]. Яъни Билол розияллоҳу анҳу бу дунёда яшар экан, ўзининг жаннат аҳлидан эканини билар эди. Шунинг учун ҳам ўлими келган пайт унинг олдида йиғлаб, увиллаб турган аёлига қараб: «Нега йиғлаяпсан? Ахир эртага Муҳаммад соллаллоҳу алайҳи ва саллам ва у кишининг асҳоблари билан учрашаман-ку!» деган эди. Билолнинг ўлим билан юзма-юз турган ҳолатига боқинг! Албатта, бу хурсандчиликка юзланишдир. Чунки у жаннатга кетаётганини аниқ билади. Бу ҳақда унга ростгўйларнинг ростгўйи бўлмиш зот соллаллоҳу алайҳи ва саллам хабар берганлар!

Мана бу киши Абдуллоҳ ибн Масъуд розияллоҳу анҳу. У киши арок дарахтининг новдасини ёки хурмо мевасини олиш учун дарахтга чиққан пайт, болдирларининг озғинлигини кўриб саҳобалар кулдилар. Шунда Расулуллоҳ соллаллоҳу алайҳи ва саллам: «Жоним қўлида бўлган Зотга қасамки, албатта, бу иккала болдир тарозида Уҳуддан кўра оғирроқдир», дедилар[2].

Аллоҳ азза ва жалланинг тарозисида вазни Уҳуд тоғидан-да оғирроқ эканини билган Абдуллоҳ ибн Масъуднинг бундан кейин дунёдаги ҳолатини тасаввур қилаверинг! Шунингдек, Ҳасан ва Ҳусайн розияллоҳу анҳумо ҳам жаннат билан суюнчи олинган зотлар жумласидандир. Термизий Абу Саид Худрий розияллоҳу анҳудан ривоят қилган ҳадисда Расулуллоҳ соллаллоҳу алайҳи ва саллам: «Ҳасан ва Ҳусайн жаннат йигитларининг саййидларидир»,[3] деганлари айтилади. Шу ўринда жаннат аҳли йигитларининг саййидлари эканини билган Ҳасан билан Ҳусайн розияллоҳу анҳумо учун бу дунёнинг қадр-қиймати қанчалик бўлиши мумкин?!

Хадича розияллоҳу анҳо-чи? Бухорий Абу Ҳурайра розияллоҳу анҳудан ривоят қилган ҳадисда у киши айтади: “Жаброил алайҳиссалом Набий соллаллоҳу алайҳи ва салламнинг ҳузурларига келиб: «Хадичага Раббидан ва мендан салом айтинг, унга жаннатда марвариддан барпо этилган, шовқин ҳам, машаққат ҳам бўлмаган бир қаср хушхабарини беринг», деди[4]. Хадича розияллоҳу анҳо жаннат аҳлидан эканини билди, фақат шунинг ўзигина эмас, балки Рабби унга салом йўллади, Жаброил ҳам салом айтди, унга дуру марвариддан ясалган, шовқин-сурон ҳам, чарчоғу машаққат ҳам бўлмаган бир қаср хушахабари берилди. Энди у қандай қилиб, дунёга боғланиши мумкин?! Қандай қилиб, намозларида хушуъ қилмаслиги мумкин?! Қандай қилиб, молу дунёси билан жиҳод қилмаслиги мумкин?! Қандай қилиб, Раҳмоннинг жаннатига муштоқ бўлмаслиги мумкин?!

Яна, Расулуллоҳ соллаллоҳу алайҳи ва саллам жаннатга ҳисоб-китобсиз ва азобланмасдан кирадиган етминг минг киши ҳақида сўзлаганларида, Уккоша ибн Миҳсан: «Эй Расулуллоҳ, Аллоҳга дуо қилинг, мени ҳам улардан қилсин», дейди. У зот: «Эй Аллоҳ, уни ўшалардан қилгин», деб дуо қиладилар. Шунда бошқа бир киши ҳам туриб, айни нарсани ўтинганида: «Уккоша сендан ўзиб кетди», деб жавоб қиладилар[5]. Шунга кўра, Уккоша ўзининг жаннат аҳлидан эканини билганини, ҳаётининг барчасини нега жиҳод ила ўтказганини, Расулуллоҳ соллаллоҳу алайҳи ва саллам билан барча жангларда қатнашганини, ҳатто у зотнинг вафотидан кейин ҳам бу ишда бардавом бўлиб, муртадларга қарши Ямома жангида шаҳид бўлганини тушунишимиз мумкин. Ахир у энди қандай қилиб бу дунё ҳаётига сабр қила олиши мумкин?! Ушбу тажрибаларнинг барчаси саҳобаларни «илмул яқийн» (аниқ билиш) деб номланган иймоний мартабадан ундан ҳам кўра юксакроқ бўлган «айнул яқийн» (аниқ кўриш) деган иймоний мартабага кўтарган эди.

Бинобарин, саҳобалар барча нарсани, ҳатто талай ғайб ишларини-да Расулуллоҳ соллаллоҳу алайҳи ва салламнинг тавсифлари асосида ўз кўзлари билан кўрган эдилар.

[1]Бухорий, 1149.

[2]Албоний «Ирвоул ғалил»да (1/104) келтирган ва санади яхши деган.

[3]Термизий, 3768. Албоний «Саҳиҳул жомеъ»да (3181) келтирган.

[4]Бухорий (1791, 1792), Муслим (2433).

[5]Бухорий (5811), Муслим (216).

Зубайр Исмоил 1993 йил Андижон вилоятида таваллуд топган. 2012 йил Мадинаи Мунавварадаги Ислом Университетига ўқишга кириб, 2018 йил университетнинг Араб Тили факултетини тамомлаган.

Изоҳ қолдиринг