Саҳобий бўлинг: Чўғни чангаллаганлар (6)

0

(Давоми)

Сўнг, келинг, қиёмат кунига бир назар ташлайлик: У ерда ҳар ким ўзгача ҳисоб-китоб қилинадими?! Йўқ, ҳисоб – ўша ҳисоб, тарози – ўша тарози. У ерда биринчи авлод учун алоҳида, иккинчи авлод учун алоҳида, ўнинчи авлод учун алоҳида тарози бор, деган гап йўқ. Балки, у ерда фақатгина битта тарози бор. Абу Бакр, Умар, Усмон, Али, Билол, Саъд, Абу Ҳурайра, Холид, Хадича, Ойша, Умму Аммора (Аллоҳ барчаларидан рози бўлсин) амаллари тортиладиган айни мезонда улардан кейинги авлод бўлмиш Мусо ибн Нусайр, Ториқ ибн Зиёд, Салоҳиддин Айюбий, Ибн Касир, Нававий, Бухорий, Қутуз ва барча солиҳу ярамас кимсалар, хуллас, жами одамзоднинг амали ҳам тортилади. Мен билан сизнинг ҳам, бутун ер аҳлининг ҳам амали айни мезонда тортилади. Шунинг учун ҳам ўзингизни кимларга солиштиришингиз кераклигини билишингиз шарт. Шундай экан, иймонга оид ишларда ўзингиздан юқоридагиларга қарангки, мана шу нарса амалга кўпроқ ундайди. Дунё ишларида эса ўзингиздан паст кишиларга қарангки, мана шу Аллоҳнинг неъматларини менсимай қолишдан кўпроқ тўсади. Аллоҳ таоло битта шариатни фарз қилган, битта тўғри йўлни яратган экан, У Зот субҳонаҳу ва таоло Расулуллоҳ саллаллоҳу алайҳи ва саллам пайғамбар этиб юборилганларидан сўнг йигирма уч йилдан ортмай вафот этишларини, бу дунёда абадий қолмасликларини ҳам билган. Шунга қарамай, У Зот Расулуллоҳ саллаллоҳу алайҳи ва салламдан кейин келувчилар учун шариатдан бирор нарсани енгиллатмаган, қиёматга қадар келувчилар учун ҳам бирор нарсани енгиллатмайди. Агар буларнинг бари чин бўлса, шак-шубҳа йўқки, биз каби эргашувчилар, биздан олдингилар ва кейингилар – барчаси саҳобалар босиб ўтган йўлнинг белгиларини таний олади ва Расулуллоҳ саллаллоҳу алайҳи ва салламнинг йўқликларида ҳам саҳобалар етиб борган жойга етиб бора олади. Бу ақл учун тушунарли ва равшан бўлган нарсадир. Зеро, Аллоҳнинг динида ноаниқ, жумбоқ бўлган бирор иш йўқ, Аллоҳнинг динида зоҳир ва ботин деган нарса йўқ. Балки, барча нарса зоҳир, равшан, очиқ-ойдиндир. Бизнинг динимизда фақат баъзи солиҳ кишиларгина хабардор бўладиган, Аллоҳнинг китобида ё Расулининг суннатида бизга баён этилмаган нарсалар билан У Зотга ибодат қиладиган махфий сирлар йўқ, Дарҳақиқат, Биз сизга Қуръонни (ҳалол ва ҳаром, савоб ва азоб каби баён қилишга эҳтиёж бўлган ҳукмларни) очиқлаб бериш учун ва (уни гумроҳликдан ҳаққа йўллайдиган) ҳидоят бўлиши, (иймон келтирган ва унга амал қилган кишиларга) раҳмат бўлиши, мўминларга (гўзал оқибатлари тўғрисидаги) ҳушхабар бўлиши учун нозил қилдик (Наҳл, 89).

Зубайр Исмоил 1993 йил Андижон вилоятида таваллуд топган. 2012 йил Мадинаи Мунавварадаги Ислом Университетига ўқишга кириб, 2018 йил университетнинг Араб Тили факултетини тамомлаган.

Изоҳ қолдиринг