Аёл кишининг ишлаши учун шаръий талаблар

Савол:
Мен бир қизга уйланмоқчиман. У тикувчилик цехида ишлайди. Никоҳдан кейин ишга боришига рухсат берсам, ишга ҳижобда борса, жоизми?

Жавоб:
Алҳамдулиллаҳ.

Аёл кишининг уйдан ташқарида ишлаши учун Исломда бир қанча талаблар мавжуд:

1. Жамиятнинг аёл меҳнатига ёки аёлнинг ўзининг ишлашга эҳтиёжи бўлиши.

Аслида аёл киши уйда ўтириши, рўзғор ишлари ва бола тарбияси билан машғул бўлиши лозим. Аллоҳ таоло айтади: «(Эй Пайғамбар аёллари ва мўмина аёллар) уйингизда ўтиринг, илгариги жоҳилият ясан-тусани каби ясан-тусан қилманг» (Аҳзоб сураси, 33).

Жамиятда муаллималик, ҳамширалик, доялик, каби аёлга хос ва мос ишларга эҳтиёж бўлса ёки аёлнинг ўзида ишлашга эҳтиёж туғилса, ана ўшанда уйидан ташқарида ишлаши жоиз бўлади.

Жамият барпо этиш, келажак авлодни етиштириш учун эркак билан аёл ўзаро бир-бирини такомиллаштирувчи вазифаларни бажаришлари лозим. Эркак оилани боқиш, аёли ва фарзандларини моддий таъминлаш учун ишлайди, меҳнат қилади. Аёл эса уйда ўтириб рўзғор ишлари, фарзандлар тарбияси билан шуғулланади.

2. Ишда эркакларга аралашмаслик ва улар билан холи қолмаслик.

Ислом аёл кишига номаҳрам эркакларга аралашмасликни фарз қилган. Аллоҳ таоло айтади: «Агар аёллардан бирон нарса сўрасангиз, парда ортидан сўранг» (Аҳзоб сураси, 53).

Шунингдек, Ислом аёл кишига номаҳрам эркаклар билан холи қолишни ҳаром қилган. Расулуллоҳ (саллаллоҳу алайҳи ва саллам) айтадилар: «Эркак аёл билан холи қолдими, албатта, учинчиси шайтон бўлади». Аёлларнинг эркаклар билан аралашишига, холи қолишига йўл очиш жамиятда турли-туман ахлоқсизлик, ижтимоий иллатлар, зино ва фаҳшнинг кўпайишига, натижада хайр-бараканинг кўтарилишига, Аллоҳнинг азоб-уқубатлари тушишига сабаб бўлади.

3. Ишнинг аёл кишига муносиб бўлиши.

Аёл киши уйидан ташқарида ишлашига тўғри келган чоғда аёллик табиати ва латофатига мос келмаган ишларда ишлаши жоиз эмас. Масалан, аёлга завод ва фабрикалардаги оғир ишлар ёки аёллик нафосати ва шарафига зид бўлган ишлар топширилмайди.

4. Аёлнинг умумий бошқарув ишларида ишламаслиги.

Аёл кишининг давлат раҳбари, қозилик, шаҳар ва вилоят ҳокимлиги каби умумий бошқарув мансабларида ишлари жоиз эмас. Расулуллоҳ соллаллоҳу алайҳи ва саллам: «Бошқарув ишини аёлга топширган қавм нажот топмайди», деганлар.

5. Аёлнинг валийси ишлашига рухсат бериши.

Аёл киши уйидан ташқарида ишлаши учун отаси, эри каби шариат белгилаган валийси рухсат бериши зурур. Чунки эркак оила бошчисидир. Бинобарин, оилага тааллуқли ҳар бир муҳим ишда унинг рухсати лозим. Шариат аёл киши жамоат намозига қатнашиш мақсадида масжидга бориши учун эрининг рухсатини шарт қилган экан, демак, ундан бошқа ишларда унинг рухсатини олиш янада таъкидлироқ бўлади.

6. Кўчага чиқишда шаръий ҳижоб талабларига риоя қилиш.

Маълумки, Аллоҳ таоло аёлга ҳижоб кийишни фарз қилган. Аллоҳ таоло айтади: «Эй Пайғамбар, аёлларингизга ва мўминларнинг аёлларига айтинг, устларига ёпинчиқларини ташлаб олсинлар. Мана шундай қилишлари (уларнинг ҳур ва иффатли аёллар сифатида) билинишларига ва натижада (қалбида шаҳват марази бўлган фосиқ кимсалар томонидан) озорланмасликларига яқинроқдир» (Аҳзоб сураси, 59). Демак, аёл киши кўчага отланар экан, номаҳрам эркаклар олдидан ўтар экан, баданининг барча жойини ҳижоби билан тўсиши фарздир.

Хулоса қилиб айтадиган бўлсак, бўлажак аёлингиз номаҳрам эркаклар билан аралашмайдиган, холи қолмайдиган тикув цехида ишласа, кўчага чиқишда шаръий ҳижобда чиқса, умуман олганда юқорида зикр қилинган шартларга риоя қилса, бундай жойда ишлаши жоиз, валлоҳу аълам.