Ибодат – пайғамбарлар даъвати
Аллоҳ таоло инсониятни ёлғиз Ўзига ибодат қилишлари учун яратган. Шунинг учун ибодат Аллоҳга энг суюкли ва Аллоҳни энг рози қилувчи амалдир.
Аллоҳ таоло айтди:
“Жин ва инсонларни фақат Менга ибодат қилишлари учун яратдим”.
Аллоҳ таоло барча пайғамбарларни мана шу тавҳидга чақириш учун юборган. Нуҳ алайҳиссалом қавмига айтди: “Аллоҳга ибодат қилинглар, сизлар учун Ундан ўзга бирон илоҳ йўқдир”.
Ҳуд, Солиҳ, Шуайб ва бошқа пайғамбарлар (алайҳимуссалом) ҳам қавмларини энг олдин Аллоҳга ибодат қилишга, Унга ҳеч нарсани шерик қилмасликка чақиришган ва бу даъват барча пайғамбарларнинг асосий вазифаси бўлган.
Аллоҳ таоло яна деди:
“Аниқки, Биз ҳар бир умматга: «Аллоҳга ибодат қилинглар ва тоғутдан йироқ бўлинглар», деб пайғамбар юборганмиз”.
“(Эй пайғамбар,) Биз сиздан илгари юборган ҳар бир элчига ҳам: «Мендан ўзга ҳеч қандай ҳақ илоҳ йўқ, шундай экан, Менгагина ибодат қилинглар», деб ваҳий юборганмиз”.
“(Эй инсонлар,) Сизларнинг динингиз ҳақиқатда бир диндир (яъни, Исломдир). Мен эса сизларнинг барчангизнинг Раббингиздирман. Шундай экан, Менгагина ибодат қилинглар!”
Аллоҳ таоло элчиси Муҳаммад (саллаллоҳу алайҳи ва саллам)ни то ўлим келгунича Аллоҳга ибодат қилишдан тўхтамасликка буюрди:
“То сизга ўлим келгунича Раббингизга ибодат қилинг!”
Аллоҳ таоло фаришталари сусткашлик қилмасдан Ўзига ибодат қилишларини зикр этди:
“Осмонлар ва Ердаги бор жонзот Уникидир. Ҳузуридаги зотлар (яъни, фаришталар) Унга ибодат қилишдан орланиб-зорланмайдилар. Улар туну кун сусткашлик қилмасдан Аллоҳни поклайдилар”.
Аллоҳ таоло Ўзига ибодат қилишдан кибру ҳаво этган кимсаларни хор бўлиб жаҳаннамга киришларини хабар берди:
“Албатта, Менга ибодат қилишдан кибр-ҳаво қилган кимсалар яқинда бўйинларини эгган ҳолларида жаҳаннамга кирурлар”.
