Аллоҳ суйган бандалар: Хотин ва зурриётнинг солиҳлигини тилаб дуо қилиш (2)

0

Солиҳа хотинга эришиш йўллари

  1. Дуо

Мусулмон киши Аллоҳ азза ва жалладан солиҳа хотин насиб этишини сўраб кўп дуо қилиши лозим. Зеро, барча ишлар Унинг қўлидадир. Ким яхшию, ким ёмонлигини ёлғиз Аллоҳнинг Ўзи билади. Аллоҳ таборака ва таоло деди: “Фақат Менгагина дуо-илтижо қилинглар. Мен сизларнинг дуоларингизни қабул қиламан” (Ғофир, 60).

Пайғамбар саллаллоҳу алайҳи ва саллам айтганлар: “Дуо ибодатдир”[1].

  1. Диндор аёл танлаш

Аллоҳ таолодан солиҳа хотин сўраган мусулмон киши дуо билангина чекланиб қолмайди, балки бунинг учун сабабларни ишга солиб, диндор аёл қидиради. Чунки ҳақиқий диндор, тақводор аёлгина эрига бахт келтиради, Парвардигорини рози қилади ва фарзандларига гўзал тарбия беради. Диндор аёл деганда Аллоҳ таолонинг амрларини бажаришга қаттиқ тиришадиган, Пайғамбар саллаллоҳу алайҳи ва саллам суннатларига эргашадиган, у зотга итоат этадиган, динини яхши ўрганган, зоҳиру ботинда унга мустаҳкам амал қиладиган аёл назарда тутилади.

Абу Ҳурайра разияллоҳу анҳудан ривоят қилинган ҳадисда келишича, Расулуллоҳ саллаллоҳу алайҳи ва саллам бундай дедилар: “Аёл кишига тўрт нарса: бойлиги, насл-насаби, чиройи ва дини учун уйланилади. Барака топкур, сен диндорини танла”[2].

  1. Истихора қилиш

Мусулмон киши диндор аёл топганидан сўнг, унга уйланиш борасида Аллоҳдан истихора қилиши лозим бўлади. Чунки ҳар бир ишнинг махфий жиҳатларини, одамлар қалбидаги яширин сирларни ёлғиз Аллоҳ таологина билувчидир.

Жобир разияллоҳу анҳудан ривоят қилади: “Расулуллоҳ саллаллоҳу алайҳи ва саллам бизларга Қуръондан сура ўргатгандек ҳар бир ишда истихора қилишни ҳам ўргатиб, шундай дер эдилар: “Бирортангиз бир иш қилишни дилига тугса, фарз намозидан бошқа икки ракаат (нафл) намоз ўқисин-да, сўнгра айтсин: “Ё Аллоҳ, илминг билан Сендан яхшилик сўрайман. Қудратинг билан Сендан қодирлик ва улуғ фазлингни сўрайман. Зеро, Сен қодирсан, мен ожизман, Сен билувчисан, мен билмайман, Сен ғайбни билувчисан. Ё Аллоҳ, агар мана шу ишим – ҳожатининг номини айтади –  динимда, ҳаётимда, ишларимнинг оқибатида, дунё ва охиратимда мен учун яхши бўлса, уни менга насиб эт. Агар мана шу ишим – ҳожатининг номини айтади –  динимда, ҳаётимда, ишларимнинг оқибатида, дунё ва охиратимда мен учун ёмон бўлса, уни мендан ва мени ундан узоқлаштир. Қаерда бўлса ҳам менга яхшиликни тақдир қил ва мени тақдиримдан рози қил[3].

  1. Аёлига динни ўргатиш

Аёлининг солиҳа бўлишини истаган эр унга дин асосларини ўргатиши керак. Унга қандай қилса Аллоҳга ҳақиқий иймон келтириб, соф тавҳидга эга бўлишини, Аллоҳнинг исм ва сифатларига Унинг улуғлигига лойиқ тарзда иймон келтиришни, Аллоҳ ҳақида қандай эътиқод қилиши кераклигини, нималарни Аллоҳга нисбат берса бўлади-ю, нималар жоиз эмаслигини, бандаларга вожиб бўлган иймон арконларини, Ислом ҳукмларини, ҳалол ва ҳаром масалаларини, ибодат турлари ва қонун-қоидаларини таълим бериши, амал қилишга ундаши ва қизиқтириши зарур. Хоссатан намозни вақтида ўқишни, фарз ва суннатларини, намозни бузадиган ишлар ва макруҳларини ўргатиши лозим. Аллоҳнинг аёллар устидаги ҳақлари, эр-хотин ўртасидаги ҳақлар, ахлоқ-одоб, қалб саломатлиги, уни ҳасад ва буғзу адоват иллатидан сақлаш, тилни ғийбат, чақимчилик, ҳақорат ва ёлғондан тийиш каби ибодатларни ўргатиб, бу ишларнинг барида имкони борича хотинига йўл-йўриқ кўрсатиши, кузатиб туриши керак.

Аллоҳ таоло деди: “Эй мўминлар, сизлар ўзларингизни ва аҳли оилангизни ёқилғиси одамлар ва тошлар бўлган дўзах ўтидан сақланглар. Дўзах устида куч-қувватли, раҳм-шафқатни билмайдиган, Аллоҳнинг амрларига асло хилоф қилмайдиган ва ўзларига буюрилган ишни албатта бажарадиган малоикалар турур” (Таҳрим, 6).

Али разияллоҳу анҳу айтади: “Аҳли оилангизга одоб-ахлоқ ва таълим-тарбия беринг”.

Мужоҳид раҳимаҳуллоҳ айтади: “Аллоҳдан қўрқинг ва оилангизни ҳам тақвога буюринг”.

Заҳҳок раҳимаҳуллоҳ дейди: “Оиласи, хизмат чўри ва қулларига Аллоҳ уларга фарз қилган амаллар ва қайтарган ишларни ўргатиши ҳар бир мусулмон бурчидир”.

[1] Аҳмад ва «Сунан» соҳиблари ривояти. Албоний “Саҳиҳ ал-жомеъ”да (3401) саҳиҳ деган.

[2] Бухорий, Муслим, Абу Довуд, Насоий ва Ибн Можа ривояти.

[3] Бухорий, Абу Довуд, Термизий, Насоий ва Ибн Можа ривояти.

Камолиддин Иноятуллоҳ 1971-йил Тошкент шаҳрида таваллуд топган. Ўрта мактабни битиргач Бухородаги "Мир Араб" мадрасасида сўнг Тошкент Ислом институтида таҳсил олган. Турли йилларда Ҳасти Имомдаги Диний идора кутубхонасида мудир, Тошкент шаҳридаги масжидларда имом бўлган ҳамда "Абулқосим" ва "Кўкалдош" мадрасаларида мударрислик қилган.

Изоҳ қолдиринг