Тафсири муяссар: “Бақара” сураси, 284-286 оятлар

0

لِلَّهِ مَا فِي السَّمَوَاتِ وَمَا فِي الأَرْضِ وَإِنْ تُبْدُوا مَا فِي أَنفُسِكُمْ أَوْ تُخْفُوهُ يُحَاسِبْكُمْ بِهِ اللَّهُ فَيَغْفِرُ لِمَنْ يَشَاءُ وَيُعَذِّبُ مَنْ يَشَاءُ وَاللَّهُ عَلَى كُلِّ شَيْءٍ قَدِيرٌ (284)

  1. Еру осмонлар ва улардаги барча нарса Аллоҳнинг мулкидир. Аллоҳ уларнинг эгаси, бошқарувчиси, улардан хабардор зот, ҳеч бир нарса Унга махфий эмас. Дилингиздаги нарсани хоҳ ошкор қилинг, хоҳ яширинг, Аллоҳ албатта уни билади ва сизларни шунга кўра ҳисоб-китоб қилади, истаган кишисини афв этиб, истаганини азоблайди. Аллоҳ барча нарсага қодир зотдир.

Кейин Аллоҳ таоло мусулмонларга марҳамат кўрсатиб, қалб кечинмалари ва кўнгилдан ўтган нарсаларни, модомики улар сўз ё амалга кўчмас экан, афв қилди. Бу ҳақда Расулуллоҳ саллаллоҳу алайҳи ва салламдан саҳиҳ ҳадислар келган.

آمَنَ الرَّسُولُ بِمَا أُنزِلَ إِلَيْهِ مِنْ رَبِّهِ وَالْمُؤْمِنُونَ كُلٌّ آمَنَ بِاللَّهِ وَمَلائِكَتِهِ وَكُتُبِهِ وَرُسُلِهِ لا نُفَرِّقُ بَيْنَ أَحَدٍ مِنْ رُسُلِهِ وَقَالُوا سَمِعْنَا وَأَطَعْنَا غُفْرَانَكَ رَبَّنَا وَإِلَيْكَ الْمَصِيرُ (285)

  1. Аллоҳнинг пайғамбари Муҳаммад саллаллоҳу алайҳи ва саллам ўзига Раббидан ваҳий қилинган нарсаларга қатъий иймон келтирди. Мўминлар ҳам Қуръони каримга иймон келтириб, унга амал қилдилар. Уларнинг ҳар бири Аллоҳни улуғлик ва комиллик сифатларига эга Раб ва маъбуд деб иймон келтирди. Аллоҳнинг улуғ фаришталари борлигига, китоблар туширганига ва бандаларига элчилар қилиб пайғамбарлар юборганига иймон келтирди. Биз мўминлар у пайғамбарларнинг баъзиларига иймон келтириб, баъзиларини инкор этмаймиз, балки ҳаммаларига бирдек иймон келтирамиз. Пайғамбар ва мўминлар: «Эй Раббимиз, Сен ваҳий қилган нарсаларни эшитдик ва барчасига итоат этдик. Ўз фазли марҳаматинг билан гуноҳларимизни мағфират қилишингни умид қиламиз. Сен бизларни Ўз неъматларинг билан парвариш этдинг. Ёлғиз Сенинг ҳузурингга қайтамиз», дедилар.

لا يُكَلِّفُ اللَّهُ نَفْساً إِلاَّ وُسْعَهَا لَهَا مَا كَسَبَتْ وَعَلَيْهَا مَا اكْتَسَبَتْ رَبَّنَا لا تُؤَاخِذْنَا إِنْ نَسِينَا أَوْ أَخْطَأْنَا رَبَّنَا وَلا تَحْمِلْ عَلَيْنَا إِصْراً كَمَا حَمَلْتَهُ عَلَى الَّذِينَ مِنْ قَبْلِنَا رَبَّنَا وَلا تُحَمِّلْنَا مَا لا طَاقَةَ لَنَا بِهِ وَاعْفُ عَنَّا وَاغْفِرْ لَنَا وَارْحَمْنَا أَنْتَ مَوْلانَا فَانصُرْنَا عَلَى الْقَوْمِ الْكَافِرِينَ (286)

  1. Аллоҳнинг дини машаққатсиз, қулай ва енгилдир. Аллоҳ бандаларидан тоқатларидан ташқари нарсани талаб қилмайди. Ким яхшилик қилса мукофотини олади, ким ёмонлик қилса жазосини тортади. Эй Раббимиз, бизларга фарз қилганинг ишлардан бирортасини унутсак ёки Сен қайтарган ишлардан бирортасини қилиб қўйиб, хатога йўл қўйсак, бизларни жазолама. Эй Раббимиз, биздан илгари ўтган осийларга уқубат ўлароқ юклаганинг оғир ишларни бизга юклама. Эй Раббимиз, бизга тоқатимиздан ташқари мажбуриятларни юклама, сабримиз етмайдиган бало-мусибатларни бошимизга солма. Гуноҳларимизни кечир, айбларимизни яшир, бизга раҳм-шафқат қил. Сен бизнинг эгамиз ва бошқарувчимизсан. Динингни инкор қилган, ягоналигингга шак келтирган, пайғамбаринг Муҳаммад саллаллоҳу алайҳи ва салламни ёлғончига чиқарган кимсалар устидан бизга нусрат ато эт ва дунёю охиратда бизни улардан устун қил.

Изоҳ қолдиринг