Тафсири муяссар, Оли Имрон сураси, 86-92 оятлар

0

كَيْفَ يَهْدِي اللَّهُ قَوْماً كَفَرُوا بَعْدَ إِيمَانِهِمْ وَشَهِدُوا أَنَّ الرَّسُولَ حَقٌّ وَجَاءَهُمْ الْبَيِّنَاتُ وَاللَّهُ لا يَهْدِي الْقَوْمَ الظَّالِمِينَ (86)

  1. Муҳаммад саллаллоҳу алайҳи ва салламга иймон келтириб, у зотнинг ҳақ пайғамбар эканига ва келтирган дини ҳақ эканига гувоҳ бўлишганидан сўнг ва бу борада уларга Аллоҳдан далиллар келганидан кейин у пайғамбарни инкор қилган қавмни Аллоҳ қандай иймонга муваффақ этсин?! Аллоҳ ҳақдан ботилга бурилиб, иймон ўрнига куфрни ихтиёр қилган золим қавмни тўғри йўлга ҳидоят қилмайди.

أُوْلَئِكَ جَزَاؤُهُمْ أَنَّ عَلَيْهِمْ لَعْنَةَ اللَّهِ وَالْمَلائِكَةِ وَالنَّاسِ أَجْمَعِينَ (87)

  1. У золимларнинг жазоси – уларга Аллоҳнинг, фаришталарнинг ва барча инсонларнинг лаънати бўлгай. Улар Аллоҳнинг раҳматидан қувилган кимсалардир.

خَالِدِينَ فِيهَا لا يُخَفَّفُ عَنْهُمْ الْعَذَابُ وَلا هُمْ يُنْظَرُونَ (88)

  1. Улар дўзахда абадий қоладилар, нафас ростлаб олишлари учун азоб улардан бир оз бўлса-да енгиллатилмайди, келтирган узру баҳоналари сабабли асло кечиктирилмайди ҳам.

إِلاَّ الَّذِينَ تَابُوا مِنْ بَعْدِ ذَلِكَ وَأَصْلَحُوا فَإِنَّ اللَّهَ غَفُورٌ رَحِيمٌ (89)

  1. Аммо куфр ва зулмларидан қайтиб, Парвардигорларига холис тавба қилган ҳамда бузғунчиликларини тавба билан тузатган кишилар бундан мустаснодир. Аллоҳ уларнинг тавбаларини қабул қилади. У бандаларининг гуноҳларини кечирувчи (Ғафур), уларга раҳмли (Раҳим) зотдир.

إِنَّ الَّذِينَ كَفَرُوا بَعْدَ إِيمَانِهِمْ ثُمَّ ازْدَادُوا كُفْراً لَنْ تُقْبَلَ تَوْبَتُهُمْ وَأُوْلَئِكَ هُمْ الضَّالُّونَ (90)

  1. Иймон келтирганларидан сўнг кофир бўлган ва бир умр куфрда яшаган кимсаларнинг ўлим онида қилган тавбалари асло қабул қилинмайди. Ана ўшалар адашган ва йўлдан озган кимсалардир.

إِنَّ الَّذِينَ كَفَرُوا وَمَاتُوا وَهُمْ كُفَّارٌ فَلَنْ يُقْبَلَ مِنْ أَحَدِهِمْ مِلْءُ الأَرْضِ ذَهَباً وَلَوْ افْتَدَى بِهِ أُوْلَئِكَ لَهُمْ عَذَابٌ أَلِيمٌ وَمَا لَهُمْ مِنْ نَاصِرِينَ (91)

  1. Муҳаммад саллаллоҳу алайҳи ва салламнинг пайғамбарлигини инкор қилган ҳамда Аллоҳ ва Расулига кофир бўлиб ўлган кимсалар қиёмат куни ўзларини Аллоҳнинг азобидан қутқариб олиш учун ер юзи тўла олтинни тўлов сифатида берсалар ҳам, улардан асло қабул қилинмайди. Улар учун аламли азоб бордир ва улар учун Аллоҳнинг азобидан қутқариб олувчи бирон ёрдамчи бўлмайди.

لَنْ تَنَالُوا الْبِرَّ حَتَّى تُنْفِقُوا مِمَّا تُحِبُّونَ وَمَا تُنْفِقُوا مِنْ شَيْءٍ فَإِنَّ اللَّهَ بِهِ عَلِيمٌ (92)

  1. Эй мўминлар, то ўзингиз суйган нарсалардан инфоқ-эҳсон қилмагунча асло жаннатга эришолмайсиз. Озми, кўпми, бирон нарсани инфоқ-эҳсон қилсангиз, уни албатта Аллоҳ билиб турувчидир. У ҳар кимни амалига яраша тақдирлайди.

Изоҳ қолдиринг