Тафсири муяссар, Оли Имрон сураси, 118-120 оятлар

0

يَا أَيُّهَا الَّذِينَ آمَنُوا لا تَتَّخِذُوا بِطَانَةً مِنْ دُونِكُمْ لا يَأْلُونَكُمْ خَبَالاً وَدُّوا مَا عَنِتُّمْ قَدْ بَدَتْ الْبَغْضَاءُ مِنْ أَفْوَاهِهِمْ وَمَا تُخْفِي صُدُورُهُمْ أَكْبَرُ قَدْ بَيَّنَّا لَكُمْ الآيَاتِ إِنْ كُنْتُمْ تَعْقِلُونَ (118)

  1. Эй Аллоҳ ва Расулига иймон келтирган ва Аллоҳнинг шариатигаамал қилган кишилар, мўминларни қўйиб, кофирларни сирдош дўст тутманглар! Улар сизларга ёмонлик қилиш йўлида бор кучларини сарфлашади, сизларга етган ҳар қандай зарар ва ёмонликдан хурсанд бўлишади. Сизларни қаттиқ ёмон кўришлари оғизларидан чиқаётган сўзларида ошкор бўлди, дилларида яширинган адоват ундан-да кучлироқ ва каттароқдир. Агар ақлингизни ишлатиб, Аллоҳнинг панд-насиҳатлари, буйруқ ва тақиқларини яхши англовчи бўлсангиз, ибрат олинг ва эҳтиёт бўлинг деб сизларга далил ва ҳужжатларни очиқ баён қилдик.

هَاأَنْتُمْ أُوْلاءِ تُحِبُّونَهُمْ وَلا يُحِبُّونَكُمْ وَتُؤْمِنُونَ بِالْكِتَابِ كُلِّهِ وَإِذَا لَقُوكُمْ قَالُوا آمَنَّا وَإِذَا خَلَوْا عَضُّوا عَلَيْكُمْ الأَنَامِلَ مِنْ الغَيْظِ قُلْ مُوتُوا بِغَيْظِكُمْ إِنَّ اللَّهَ عَلِيمٌ بِذَاتِ الصُّدُورِ (119)

  1. Уларга муҳаббат қўйишингиз хато эканига далил шуки, сизлар уларни яхши кўрасиз ва уларга яхшилик истайсиз, улар эса сизларни ёқтирмайдилар, дилларида сизларга нисбатан нафрат ва адоват бор. Сизлар барча самовий китобларга, шу жумладан уларнинг китобларига ҳам иймон келтирасиз, улар эса сизларнинг китобингизга иймон келтиришмайди. Бас, қандай уларни яхши кўрасизлар?! Сизларга йўлиққанларида мунофиқлик билан: «Биз ҳам иймон келтирдик ва тасдиқладик», дейишади. Ўзаро холи қолишганда эса уларни ғамгинлик ва хафалик эгаллаб олади, мусулмонларнинг ўзаро аҳил-иноқликларини ва диллари бир-бирига пайванд эканини, Аллоҳ Исломни азиз, уларни эса хор қилаётганини кўриб, ғазабдан бармоқларини тишлашади. Эй Расул, сиз уларга: «Шу ғазаб ва нафратингиз билан ўлиб кетинг!» деб айтинг. Аллоҳ таоло дилларда яширин бўлган сирларни билувчи зот, ҳар бир инсонга ўзи қилган яхши ва ёмон ишларига яраша жазо ва мукофот беради.

إِنْ تَمْسَسْكُمْ حَسَنَةٌ تَسُؤْهُمْ وَإِنْ تُصِبْكُمْ سَيِّئَةٌ يَفْرَحُوا بِهَا وَإِنْ تَصْبِرُوا وَتَتَّقُوا لا يَضُرُّكُمْ كَيْدُهُمْ شَيْئاً إِنَّ اللَّهَ بِمَا يَعْمَلُونَ مُحِيطٌ (120)

  1. Эй мўминлар, уларнинг адовати шу даражадаки, сизларга ғалаба ва ўлжага эришиш каби бирор яхшилик етса, уларни ғам-андуҳ ва тушкунлик чулғаб олади. Аммо  мағлубият, молу жон ва экин-тикинга талофат етиш каби бирон мусибат бошингизга тушса, улар бундан беҳад қувонишади. Бошингизга тушган ишларга сабр қилсангиз ва Аллоҳ буюрган ишларни қилиб, қайтарган ишлардан тийилиб, тақво қилсангиз, уларнинг макрлари сизларга зарар бермайди. Аллоҳ кофирлар қилаётган жамики фасод ишлардан бохабар зот, уларни албатта қилмишларига яраша жазолайди.

Изоҳ қолдиринг