Тафсири муяссар, Оли Имрон сураси, 121-129 оятлар

0

وَإِذْ غَدَوْتَ مِنْ أَهْلِكَ تُبَوِّئُ الْمُؤْمِنِينَ مَقَاعِدَ لِلْقِتَالِ وَاللَّهُ سَمِيعٌ عَلِيمٌ (121)

  1. Эй Расул, уруш либосини кийган ҳолда уйингиздан чиқиб, асҳобларингиз сафларини тартибга келтираётган ва уларнинг ҳар бирини ўз ўрнига қўяётган чоғингизни эсга олинг. Ўшанда сизлар душман билан тўқнашиш учун Уҳуд жангига ҳозирланаётган эдингиз. Аллоҳ сўзларингизни эшитувчи ва ишларингизни билувчи зотдир.

إِذْ هَمَّتْ طَائِفَتَانِ مِنْكُمْ أَنْ تَفْشَلا وَاللَّهُ وَلِيُّهُمَا وَعَلَى اللَّهِ فَلْيَتَوَكَّلْ الْمُؤْمِنُونَ (122)

  1. Эй Пайғамбар, Бани Салама ва Бани Ҳориса қабилаларидан содир бўлган ишни эсланг. Улар душманга йўлиқишдан қўрқиб, мунофиқ бошлиқлари Абдуллоҳ ибн Убайга қўшилиб, ортга қайтиб кетиш ҳақида ўйлаб қолишганди. Бироқ Аллоҳ уларни сақлади ва бундай ножўя ишга қадам қўйишдан асраб қолди. Шундан сўнг улар Аллоҳга таваккул қилиб, сиз билан бирга юришда давом этишди. Мўминлар Аллоҳнинг ўзигагина таваккул қилсинлар!

وَلَقَدْ نَصَرَكُمْ اللَّهُ بِبَدْرٍ وَأَنْتُمْ أَذِلَّةٌ فَاتَّقُوا اللَّهَ لَعَلَّكُمْ تَشْكُرُونَ (123)

  1. Эй мўминлар, Бадр жангида ададингиз ва қурол-яроғингиз кам бўлишига қарамай, Аллоҳ сизларга мушрик душманларингиз устидан ғалаба берди. Бас, буйруқларини адо этиш ва тақиқлаган ишларидан тийилиш билан Аллоҳдан қўрқинглар! Шояд Унинг неъматлари шукрини адо этсангизлар!

إِذْ تَقُولُ لِلْمُؤْمِنِينَ أَلَنْ يَكْفِيَكُمْ أَنْ يُمِدَّكُمْ رَبُّكُمْ بِثَلاثَةِ آلافٍ مِنْ الْمَلائِكَةِ مُنْزَلِينَ (124)

  1. Эсланг эй Пайғамбар, Бадрда мушрикларга мадад етиб келиши саҳобаларингизни қийин аҳволга туширган эди. Ўшанда Биз сизга ваҳий тушириб, уларга бундай деб айтишингизни буюрдик: «Раббингиз сизларни қўллаб-қувватлашлари ва сизлар билан бирга жанг қилишлари учун самодан уч минг фариштани жанг майдонига тушириб мадад кўрсатгани сизларга кифоя қилмайдими?!»

بَلَى إِنْ تَصْبِرُوا وَتَتَّقُوا وَيَأْتُوكُمْ مِنْ فَوْرِهِمْ هَذَا يُمْدِدْكُمْ رَبُّكُمْ بِخَمْسَةِ آلافٍ مِنْ الْمَلائِكَةِ مُسَوِّمِينَ (125)

  1. Ҳа, албатта бу мадад сизларга кифоя қилади! Сизларга яна бир башорат борки, агар душман билан тўқнашганда сабр-бардошли бўлсангиз, Аллоҳ буюрган ишларни бажариб, тақиқлаган ишлардан тийилиб тақво қилсангиз, гарчи шу он Макка мушриклари сизларни қириб ташлаш мақсадида устингизга шиддат билан ёпирилсалар-да Аллоҳ таоло сизларга ўзларини ва отларини аниқ аломат билан белгили қилиб олган беш минг фаришта билан мадад беради.

وَمَا جَعَلَهُ اللَّهُ إِلاَّ بُشْرَى لَكُمْ وَلِتَطْمَئِنَّ قُلُوبُكُمْ بِهِ وَمَا النَّصْرُ إِلاَّ مِنْ عِنْدِ اللَّهِ الْعَزِيزِ الْحَكِيمِ (126)

  1. Аллоҳ таоло фаришталар орқали кўрсатган бу мададни сизлар учун фақат хушхабар ҳамда у билан қалбларингиз таскин топиши ва дилларингиз шод бўлиши учун қилди. Зотан, ғалаба фақат Аллоҳ ҳузуридандир, У ҳеч кимга енгилмайдиган қудратли (Азиз) ҳамда тадбир ва ишларида ҳикмат соҳиби (Ҳаким) зотдир.

لِيَقْطَعَ طَرَفاً مِنْ الَّذِينَ كَفَرُوا أَوْ يَكْبِتَهُمْ فَيَنْقَلِبُوا خَائِبِينَ (127)

  1. Аллоҳ таолонинг сизларга Бадрда берган ғалабаси кофирлардан бир гуруҳи қатл қилиниб ҳалок бўлиши, ўлимдан қутулиб қолганлари эса ғам-ғуссага ботиб, хор ва шарманда ҳолда, ҳасрат билан қайтишлари учун эди.

لَيْسَ لَكَ مِنْ الأَمْرِ شَيْءٌ أَوْ يَتُوبَ عَلَيْهِمْ أَوْ يُعَذِّبَهُمْ فَإِنَّهُمْ ظَالِمُونَ (128)

  1. Эй Расул, бандаларнинг ишларидан бирон нарса сизнинг ихтиёрингизда эмас, барча иш ягона ва шериксиз Аллоҳнинг қўлидадир. Шояд сизга қарши урушган айрим кишиларнинг диллари очилиб, Исломни қабул қилишар ва Аллоҳ уларнинг тавбаларини қабул қилар. Кофирлигича қолганларини эса Аллоҳ зулму тажовузлари сабабли дунё ва охиратда азоблайди.

وَلِلَّهِ مَا فِي السَّمَوَاتِ وَمَا فِي الأَرْضِ يَغْفِرُ لِمَنْ يَشَاءُ وَيُعَذِّبُ مَنْ يَشَاءُ وَاللَّهُ غَفُورٌ رَحِيمٌ (129)

  1. Осмонлару ердаги барча нарсалар ягона Аллоҳнинг қўлидадир. У истаган бандасини раҳмати билан мағфират қилади, истаган бандасини адолати билан азоблайди. Аллоҳ бандаларининг гуноҳларини кечирувчи (Ғафур) ва уларга меҳрибон (Раҳим) зотдир.

Изоҳ қолдиринг