Оилавий муносабатлар (35): Эр-хотинга бирдек тегишли гаплар

Маҳрум ким? Савобдан қуруқ қолган киши маҳрумдир.

Эр-хотин иккингиз Аллоҳга яқинлаштирадиган ишларда бирга ҳаракат қилиб, мўл-кўл савобга эришиб, юксалиб боришингиз қандай ҳам яхши!

Эр-хотин бирга ўтириб Аллоҳнинг китобини ўқиб-ўрганишингиз, Расулуллоҳ саллаллоҳу алайҳи ва салламнинг суннатларини дарс қилишингиз қандаям яхши!

Эр-хотин Аллоҳнинг динини ўрганиб, динда билимдон бўлсангиз нақадар гўзал иш бўларди!

Эр-хотин Пайғамбар саллаллоҳу алайҳи ва салламга салавот ва саломлар йўлласангиз, сизга Аллоҳнинг раҳмати ва мағфирати бўлади.

Аллоҳни кўп зикр қилувчи эркагу аёллар қаторида бўлсангиз, сизга Аллоҳнинг мағфирати ва улуғ ажр-мукофотлар бўлишидан севининг.

Эр-хотин иккингиз ибодат қилишда, гуноҳлардан тийилишда ва бошингизга келадиган мусибатларга сабрли, тўғрисўз, тоат-ибодатли тақводор, махфию ошкор садақалар қилувчи ва саҳар пайтларида истиғфор айтувчи бўлсангиз, қандай ҳам яхши оила бўласиз. Тасанно!

Ҳар иккингиз ота-онангизга совғалар бериб туринг, уларга тинмай яхшилик қилинг. Шунингдек, қариндошларга ва дўстларингизга ҳам ҳадялар бериб, кўнгилларини олишга интилинг.

Меҳмоннинг ҳурматини жойига қўйиб иззат-икром қилсангиз, қўшниларга таомлар улашиб турсангиз, қандай ҳам яхши иш қилган бўласиз!

Ғазабни ютиш ва одамларнинг хато ва камчиликларидан ўтиб юборишда салафи солиҳлардан ибрат олиб, уларнинг йўлини тутинг.

Эр-хотин бир-бирингизга тақво ва эзгуликларда ёрдам берсангиз ва аксинча, гуноҳ ва адоватда ёрдам бермасангиз, балки бундан бир-бирингизни қайтариб турсангиз, нақадар буюк савобга эга бўласиз.

Эр-хотин бир-бирингизни ҳақни маҳкам ушлашга чорласангиз ва бу йўлда сабрли бўлишга ундасангиз, Аллоҳ таоло сизни зиён-заҳматга тушиб қолишдан сақлайди.

Исломнинг беш устуни бўлган ибодатларни вақтида адо этсангиз ва Аллоҳ таоло сизни қачон ва қаерда бўлманг кўриб-кузатиб турганини ҳис қилиб ҳаёт кечирсангиз, мукофотига Аллоҳ сизни жаннатига мушарраф қилади.

Аллоҳ таоло мақтаган кишилардан ибрат олинг: “Гарчи ўзларида эҳтиёжлик ва камбағаллик бўлса-да ўзларини қўйиб, муҳожирларни ва эҳтиёжманд кишиларни муқаддам қўядилар” (Ҳашр, 9).

Тавба-тазарру ва ибодат билан Аллоҳга юзланган ҳамда Аллоҳ кўрсатган йўлда юрган зотлар йўлидан қадамма-қадам юринг.

Пайғамбарлар олиб келган Аллоҳнинг тўғри йўлига эргашинг.

Буларнинг барига қўшимча тарзда эй азиз эр-хотинлар, Аллоҳга дуо қилинг. Исломга ва мусулмонларга нусрат беришини сўранг. Ўзингизни, фарзанду зурриётингизни, қолаверса барча муслим ва муслималарни Ўз ҳифзу ҳимоясида сақлашини Аллоҳдан сўраб, дуо қилинг. Фирдавс жаннатига киритишини ва у ерда Аллоҳнинг инъомига сазовор бўлган пайғамбарлар, сиддиқлар, Аллоҳ йўлидаги шаҳидлар ва солиҳ мўминлар билан бирга қилишини сўранг. Зеро, улар жаннатдаги энг яхши ҳамроҳлардир.