Тафсири муяссар, Нисо сураси, 15-18 оятлар

0

وَاللاَّتِي يَأْتِينَ الْفَاحِشَةَ مِنْ نِسَائِكُمْ فَاسْتَشْهِدُوا عَلَيْهِنَّ أَرْبَعَةً مِنْكُمْ فَإِنْ شَهِدُوا فَأَمْسِكُوهُنَّ فِي الْبُيُوتِ حَتَّى يَتَوَفَّاهُنَّ الْمَوْتُ أَوْ يَجْعَلَ اللَّهُ لَهُنَّ سَبِيلاً (15)

  1. Хотинларингиздан қай бирлари зино қилса, сизлар – эй валийлар ва қозилар, – бунга мусулмонлардан адолатли тўртта эркак гувоҳни талаб қилинглар. Агар гувоҳлар уларнинг зино қилганига гувоҳлик беришса, уларни то ўлгунларича ёки бундан қутулиш учун Аллоҳ бошқа бир йўлни кўрсатгунича уй қамоғида сақланглар.

وَاللَّذَانِ يَأْتِيَانِهَا مِنْكُمْ فَآذُوهُمَا فَإِنْ تَابَا وَأَصْلَحَا فَأَعْرِضُوا عَنْهُمَا إِنَّ اللَّهَ كَانَ تَوَّاباً رَحِيماً (16)

  1. Зино қабоҳатини содир этган ҳар икки тарафни калтаклаш, яккалаб қўйиш, дашном бериш билан жазоланглар! Агар улар ўзлари қилган бу бузуқ ишдан тавба қилишса ва яхши амаллар қилиб ўзларини тузатишса, уларга жазо беришдан тийилинглар. Албатта, Аллоҳ таоло тавба қилувчи бандаларининг тавбаларини қабул қилувчи, уларга раҳмли зотдир.

Бу ва олдинги оятдан шу нарса олинадики, эркаклар зино қилса, калтаклаш, яккалаб қўйиш ва дашном бериш билан жазоланади, аёллар эса бунга қўшимча уй қамоғи билан ҳам жазоланади. Аёлларга тегишли ҳибснинг ниҳояси ўлимгача, ҳар иккисига тегишли юқорида зикр қилинган жазонинг ниҳояси эса тавба қилиш ва тузалишгачадир. Бу ҳукм Исломнинг аввалида бўлган эди. Кейин у Аллоҳ ва Расули жорий қилган бошқа бир ҳукм билан мансух-бекор бўлган. Аллоҳ ва Расули жорий қилган кейинги ҳукм зино қилган эр ёки хотин турмуш кўрган бўлса, уларни тошбўрон қилиш, турмуш кўрмаган (бўйдоқ) бўлса, юз дарра уриш ва бир йил сургун қилишдан иборатдир. Турмуш кўрган эр ёки хотин деганда озод, балоғатга етган, ақл-ҳуши жойида, шаръан мўътабар никоҳ орқали жинсий алоқада бўлган эркак ё аёл назарда тутилади.

إِنَّمَا التَّوْبَةُ عَلَى اللَّهِ لِلَّذِينَ يَعْمَلُونَ السُّوءَ بِجَهَالَةٍ ثُمَّ يَتُوبُونَ مِنْ قَرِيبٍ فَأُوْلَئِكَ يَتُوبُ اللَّهُ عَلَيْهِمْ وَكَانَ اللَّهُ عَلِيماً حَكِيماً (17)

  1. Аллоҳ таоло гуноҳларнинг ёмон оқибатини ва Аллоҳнинг ғазабини келтиришини билмасдан (жоҳиллик билан) гуноҳ қиладиган, кейин ўлим келмасидан бурун Парвардигорларига тавба ва тоат-ибодат билан юзланган кишилардангина тавбани қабул қилади. (Хоҳ қасддан, хоҳ билмасдан гуноҳ қилган ҳар бир осий, гарчи гуноҳининг ҳаромлигини билса ҳам, гуноҳнинг ёмон оқибатини ва Аллоҳнинг ғазабини келтиришини билмаганлиги жиҳатидан жоҳил ҳисобланади.) Аллоҳ бандаларини яхши билувчи, уларнинг ишларини тадбир ва тақдир қилишда ҳикмат соҳиби бўлган зотдир.

وَلَيْسَتِ التَّوْبَةُ لِلَّذِينَ يَعْمَلُونَ السَّيِّئَاتِ حَتَّى إِذَا حَضَرَ أَحَدَهُمُ الْمَوْتُ قَالَ إِنِّي تُبْتُ الآنَ وَلا الَّذِينَ يَمُوتُونَ وَهُمْ كُفَّارٌ أُوْلَئِكَ أَعْتَدْنَا لَهُمْ عَذَاباً أَلِيماً (18)

  1. Аллоҳ таоло гуноҳга муккасидан кетган, то жон талвасаси етиб келмагунича Парвардигорларига тавба қилмайдиган, кўзларига ўлим кўринган пайтдагина: “Мен энди тавба қилдим”, деб айтадиган кишиларнинг тавбасини қабул қилмайди. Шунингдек, Аллоҳ таолонинг бирлигини ва Унинг элчиси Муҳаммад саллаллоҳу алайҳи ва салламнинг пайғамбарлигини инкор этиб, шу ҳолда ўладиган кишиларнинг тавбаси ҳам қабул бўлмайди. Ўлим келгунича гуноҳдан тийилмайдиган ва кофир ҳолда ўладиган кимсаларга аламли азобни ҳозирлаб қўйганмиз.

Изоҳ қолдиринг