يَا أَيُّهَا الَّذِينَ آمَنُوا لا يَحِلُّ لَكُمْ أَنْ تَرِثُوا النِّسَاءَ كَرْهاً وَلا تَعْضُلُوهُنَّ لِتَذْهَبُوا بِبَعْضِ مَا آتَيْتُمُوهُنَّ إِلاَّ أَنْ يَأْتِينَ بِفَاحِشَةٍ مُبَيِّنَةٍ وَعَاشِرُوهُنَّ بِالْمَعْرُوفِ فَإِنْ كَرِهْتُمُوهُنَّ فَعَسَى أَنْ تَكْرَهُوا شَيْئاً وَيَجْعَلَ اللَّهُ فِيهِ خَيْراً كَثِيراً (19)
Эй иймон келтирган кишилар, оталарингизнинг (онангиздан бошқа) хотинларини улардан қолган мерос қаторида санаб, зўрлик билан уларга уйланишингиз, уларни турмуш қуришдан ман қилишингиз, ё мажбурлаб бировга турмушга узатишингиз жоиз эмас. Шунингдек, аёлларингизни ёқтирмай қолсангиз, сизлардан олган маҳр ва бошқа нарсаларнинг бир қисмидан воз кечишлари учун уларга зарар бериб никоҳингизда ушлаб туришингиз ҳам жоиз бўлмайди. Фақат зино каби бирон фаҳш иш қилган бўлсалар, шундагина берган нарсаларингизни қайтариб олгунингизча уларни ушлаб туришингиз мумкин. Хотинларингиз билан ҳурмат-эҳтиром, меҳр-муҳаббат ҳамда уларнинг ҳақ-ҳуқуқларини адо этиш асосида ҳаёт кечиринглар. Агар бирор дунёвий сабаб билан хотинларингизни ёқтирмай қолсангиз, шунда ҳам сабр қилинглар. Зеро, сизлар қайсидир бир ишни ёмон кўришингиз, бироқ ўша ишда кўп яхшиликлар бўлиши мумкин.
وَإِنْ أَرَدْتُم اسْتِبْدَالَ زَوْجٍ مَكَانَ زَوْجٍ وَآتَيْتُمْ إِحْدَاهُنَّ قِنطَاراً فَلا تَأْخُذُوا مِنْهُ شَيْئاً أَتَأْخُذُونَهُ بُهْتَاناً وَإِثْماً مُبِيناً (20)
Агар бир аёлни қўйиб, бошқасига уйланмоқчи бўлсангиз, гарчи талоқ қилмоқчи бўлган аёлингизга жуда кўп маҳр берган бўлсангиз ҳам, ундан бирор нарсани қайтиб олишингиз ҳалол бўлмайди. Сизлар уни очиқ ёлғон ва бўҳтон йўли билан оласизми?!
وَكَيْفَ تَأْخُذُونَهُ وَقَدْ أَفْضَى بَعْضُكُمْ إِلَى بَعْضٍ وَأَخَذْنَ مِنْكُمْ مِيثَاقاً غَلِيظاً (21)
Хотинларингизга берган маҳрни қайтариб олишингиз қандай ҳалол бўлсин?! Ахир жинсий яқинлик орқали бир-бирингиздан лаззатлангансиз ва хотинларингиз яхшилик билан бирга яшаш ёки чиройли суратда жавобларини беришга сизлардан қатъий аҳду паймон олган.
وَلا تَنكِحُوا مَا نَكَحَ آبَاؤُكُمْ مِنْ النِّسَاءِ إِلاَّ مَا قَدْ سَلَفَ إِنَّهُ كَانَ فَاحِشَةً وَمَقْتاً وَسَاءَ سَبِيلاً (22)
Оталарингиз уйланган хотинларга уйланманглар! Жоҳилият даврида қилганингиз бундан мустасно бўлиб, бунинг жавобгарлиги йўқ. Зеро, ўғиллар оталарининг хотинларига уйланиши ўта қабиҳ ва Аллоҳ ёмон кўрадиган жирканч ишдир. Жоҳилият пайтингизда қилиб юрган ишларингиз нақадар ёмон йўл ва тутумдир!
حُرِّمَتْ عَلَيْكُمْ أُمَّهَاتُكُمْ وَبَنَاتُكُمْ وَأَخَوَاتُكُمْ وَعَمَّاتُكُمْ وَخَالاتُكُمْ وَبَنَاتُ الأَخِ وَبَنَاتُ الأُخْتِ وَأُمَّهَاتُكُم اللاَّتِي أَرْضَعْنَكُمْ وَأَخَوَاتُكُمْ مِنْ الرَّضَاعَةِ وَأُمَّهَاتُ نِسَائِكُمْ وَرَبَائِبُكُم اللاَّتِي فِي حُجُورِكُمْ مِنْ نِسَائِكُم اللاَّتِي دَخَلْتُمْ بِهِنَّ فَإِنْ لَمْ تَكُونُوا دَخَلْتُمْ بِهِنَّ فَلا جُنَاحَ عَلَيْكُمْ وَحَلائِلُ أَبْنَائِكُمْ الَّذِينَ مِنْ أَصْلابِكُمْ وَأَنْ تَجْمَعُوا بَيْنَ الأُخْتَيْنِ إِلاَّ مَا قَدْ سَلَفَ إِنَّ اللَّهَ كَانَ غَفُوراً رَحِيماً (23)
Аллоҳ таоло сизларга қуйидаги аёлларга уйланишни ҳаром қилди: Ўз оналарингиз (бунга ота-онангиз тарафидан бўлган бувиларингиз ҳам дохил бўлади). Ва қизларингиз (бунга фарзандларнинг қизлари, невара, чевара ва ҳоказо қуйи авлод қизлар барчаси дохил бўлади). Ва туғишган (ота-она бир), ота бир ёки она бир опа-сингилларингиз. Ва аммаларингиз (оталарингиз ва боболарингизнинг опа-сингиллари). Ва холаларингиз (оналарингиз ва бувиларингизнинг опа-сингиллари). Ва ака-укаларингиз ва опа-сингилларингизнинг қизлари (уларнинг невара қизлари ҳам шунга дохилдир). Ва эмизган оналарингиз. Ва эмикдош опа-сингилларингиз. Расулуллоҳ саллаллоҳу алайҳи ва саллам кимга насаб жиҳатидан уйланиш ҳаром бўлса, унга эмикдошлик жиҳатидан ҳам уйланиш ҳаром эканини баён қилганлар. Ва хотинларингизнинг оналари (хотинларингиз билан қовушган бўлинг ёки бўлманг, фарқсиз). Ва ўгай қизларингиз, улар кўпинча сизларнинг уйингизда (қарамоғингизда) бўлади. Бироқ улар қарамоғингизда бўлмасалар ҳам сизларга маҳрам бўлади. Лекин шарти шуки, оналари билан қовушган бўлишингиз керак. Агар оналари билан қовушган бўлмасангиз ёки қовушмасдан талоқ қилган бўлсангиз ёки вафот этган бўлсалар, у қизларни никоҳингизга олишингиз гуноҳ бўлмайди. Аллоҳ таоло ўз пушти камарингиздан бўлган ўғилларингизнинг хотинларига уйланишингизни ҳам ҳаром қилди. Эмикдош ўғилларингизнинг ҳукми ҳам шундай. Келинларингизга уйланишингиз ҳаромлиги ўғилларингиз уларни никоҳлаб олиши биланоқ ҳосил бўлади. Ўғилларингиз улар билан хоҳ қовушган, хоҳ қовушмаган бўлсин, фарқсиз. Насаб ёки эмикдошлик жиҳатидан опа-сингил бўлган икки аёлни бир вақтнинг ўзида никоҳингизда жамлашингиз ҳам ҳаром бўлди. Жоҳилият даврида қилганингиз бундан мустасно бўлиб, бунинг жавобгарлиги йўқ.
