Нажосат — мусулмон киши ундан узоқ туриши, у теккан жойни ювиши вожиб бўлган нопок нарсалардир.
Намоз ўқувчи аёлнинг бадани, кийими ва намоз ўқийдиган жойи нажосатлардан пок бўлиши лозим, чунки нажосатлардан пок бўлиш намознинг дуруст бўлиш шартидир.
Нажосатни кетказадиган асосий нарса сувдир, чунки аслида тозалаш сув билан бўлади.
Нажосатлар уч хил бўлади:
Оғир (ғализ) нажосат. Ит оғир нажосатдир. Ит теккан нарса бир марта тупроқ билан ишқалаб, етти марта сув ила ювиш билан тозаланади.
Енгил нажосат. Овқат емай, фақат сут эмадиган ўғил боланинг пешоби. У сийиб қўйган жой устига сув қуйиб юбориш етарли, ишқалаш ёки сиқиш шарт эмас.
Ўрта даражадаги нажосат. Юқорида айтилганлардан бошқа нажосатлар. Масалан, сут эмадиган қизчанинг, овқат ейишни бошлаган болакайнинг ва катта кишиларнинг сийдиги, ҳайз қони ва ҳоказолар. Бу нажосатлар теккан жойлар то тоза бўлгунича устига сув қуйиб, ишқалаб ювилади ва сиқиб ташланади.
Нажосатларни тозалаш йўллари:
Нажосат теккан ерни тозалаш. Нажосат ахлат каби жисми бор бўлса, аввало нажосат олиб ташланади, сўнгра унинг ўрнига изи, асорати қолмагунча сув қуйилади.
Нажосат теккан кийимни тозалаш. Бунинг учун кийим нажосат кетгунича сув билан ишқалаб ювиб, сиқиб тозаланади.
Кўрпа-тўшакларни тозалаш. Уларни сув билан ёки замонавий тозалаш воситалари билан ювиб тозалаш мумкин.
Нажосат тушган сувни тозалаш. Сувнинг ранги, таъми ва ҳидида нажосатнинг белгилари, асоратлари қолмагунча нажас сувга пок сув қўшиш билан ёки замонавий тозалаш йўллари билан амалга оширилади.
Нажосатларни тозалашга оид мулоҳазалар
Нажосатлар сирасидан:
Вадий: сийдик ортидан чиқадиган лойқа ва қуюқ оқ рангдаги суюқлик. Унинг жинсий аъзодан чиқиши таҳоратни бузади, лекин ғуслни вожиб қилмайди. Вадий кийимга тегса, ювиб ташлаш керак.
Мазий: жинсий яқинлик тўғрисида хаёл қилган пайтда ёки жинсий яқинлик олдидан чиқадиган шаффоф шилимшиқ суюқлик. Мазий баданга тегса, ювиб ташлаш лозим. Кийимга теккан мазийни тозалаш учун унга бир ҳовуч сув сепиш кифоя.
Маний: у (рожиҳ фикрга кўра) покдир. Лекин кийим ёки баданга теккан маний агар ҳўл бўлса, ювиб ташлаш, қуруқ бўлса, ишқалаб юбориш мустаҳабдир.
Аёл киши кўчада экан, устига бир суюқлик томса ва томган нарсанинг сув ёки сийдик экнини билолмаса, у ҳақда сўраб суриштириши шарт эмас.
Кийимига нажосат тегса-ю, сўнг ўрни билинмай кетса ва қаерга текканини билолмаса, кийимнинг ҳамма жойини ювиш лозим.
Аёл киши намоз ўқиб бўлгач кийимида ёки баданида нажосатни кўриб қолса, у бундан олдин уни билмаган бўлса, ўқиган намози дуруст бўлиб, қайта ўқимайди.
