Ассаламу алайкум. Бир синглимиз мана бу саволни берган эди: “Ассалому алейкум. Сизга яна саволим бор эди. Пайғамбаримиз Муҳаммад соллаллоҳу алайҳи ва саллам тушларида дўзахий аёлларни кўрганини Фотима онамизга айтиб бераётиб, “(Тушимда) бир аёлни кўрдим, у кўкрагидан осилган эди”, десалар, Фотима онамиз: “У қандай аёл эди?”, деб сўраган экан. “Эридан сўрамай ўзганинг боласини эмизган аёл”, деб айтган эканлар. Шунга мен жиянимни эмизганман, бир марта, билмасдан. Шунга далил-ҳужжат билан жавоб берсангиз, илтимос. (Савол матнига жузъий тузатишлар киритилди)
Жавоб:
Аллоҳ таолога ҳамду санолар, Пайғамбаримизга салавот ва саломлар бўлсин!
Агар бола эмизилмаса ўлиб қолиш хавфи бўлса, унинг ҳаётини сақлаб қолиш учун бировнинг боласини эмизиш вожиб бўлади. Бу ҳолатда болани буюк хатардан сақлаб қолиш зарур, бунинг учун эрининг изни шарт эмас.
Агар боланинг ҳаётига хавф бўлмаса, у ҳолда эрининг изнисиз ўзганинг боласини эмизиши жоиз эмас. Чунки бу билан аёл зиммасидаги эрининг ҳаққига тажовуз қилган бўлади. Қолаверса, бу ишда маҳрамликка оид ҳукмлар бор. Булар бола эмизган аёл, эмувчи бола, аёлнинг эри ва ўша аёлнинг фарзандларига тааллуқли ҳукмлардир. Ўзганинг боласини эмизиш ортидан келиб чиқадиган ҳукмларга эри рози бўлмаслиги мумкин. Шунинг учун, албатта бировнинг боласини эмизишдан олдин эрнинг рухсатини олиш шарт. Баъзи уламолар “Аёл киши эрининг изнисиз бировнинг боласини эмизиши макруҳ (таҳримий – ҳаромга яқин макруҳ)” дейишган.
Ибн Нужайм Ҳанафийнинг “Ал-Баҳрур-Роиқ” деб номланган китобида: “Аёл киши эрининг изнисиз бировнинг боласини эмизиши макруҳдир. Магар, эмизмаса боланинг ҳалок бўлиш хавфи бўлса, унда рухсатсиз эмизиши жоиз. Балки, бу ўринда жонни сақлаб қолиш учун эмизиш вожибдир”, дейилган.
Савол йўлловчи келтирган ҳадиснинг аслини топа олмадик. Унинг айтишича, билмасдан эрининг изнисиз бир марта бировнинг боласини эмизган. Албатта билмасдан қилинган ишда жавобгарлик йўқ. Лекин мўъмин киши ўзи билмаган ишга қадам қўйишдан аввал бу ҳақда илм аҳлидан сўраши лозим. Шунингдек, қилинган хато учун Аллоҳдан истиғфор сўраш лозим, валлоҳу аълам. Аллоҳ барчамизга Ўзининг динини яхши ўрганиш, билганимизга амал қилишни насиб этсин!
