Абу Зар Жундуб ибн Жунода разияллоҳу анҳу ва Абу Абдураҳмон Муоз ибн Жабал разияллоҳу анҳудан ривоят қилинади: “Расулуллоҳ саллаллоҳу алайҳи ва саллам дедилар: “Қаерда бўлсанг ҳам Аллоҳдан тақво қил! Ёмонлик ортидан бир яхшилик қилгинки, уни ўчириб юборади. Одамлар билан чиройли хулқ ила муомалада бўлгин” (Термизий ривояти).
Ҳадисдан олинадиган сабоқлар:
Бу ҳадис Аллоҳнинг ҳақлари ва бандаларнинг ҳақларини ўзида мужассам этган васиятдир.
Тақво Аллоҳ таолонинг динини яхши билгандагина юзага келади. Чунки бундан бехабар киши нимани қилиш ва нимани тарк этиш кераклигини билмайди.
Гуноҳга тавба қилиш ва яхши амал қилишга шошилиш мўмина ва тақволи аёлларнинг хулқидир.
Гўзал хулқ, чиройли муомала ва яхши муносабат иймоннинг комиллигидандир.
Аллоҳ учун ғазабни ютиш, очиқ юзли ва кечиримли бўлиш гўзал хулқлардандир.
Расулуллоҳ саллаллоҳу алайҳи ва салламнинг чиройли хулқларидан ўрнак олиш чиройли хулқларни қўлга киритиш воситаларидандир.
