Расулуллоҳнинг кўксилари неча марта ёрилгани ҳақида

0

Савол:

Ассаламу алайкум ва рахматуллоҳ! Пайғамбаримиз соллаллоҳу алайҳи ва салламнинг кўкраклари ёрилиб, юраклари ювилгани неча марта содир бўлган?

Жавоб:

Аллоҳ таолога ҳамду санолар, Пайғамбаримизга салавот ва саломлар бўлсин!

Бу воқеа тарих китобларида тўрт марта такрорлангани айтиб ўтилган:

Биринчи марта: Расулуллоҳ соллаллоҳу алайҳи ва саллам тўрт ёшликларида, қалбларидан шайтоннинг насибасини олиб ташлаш учун  бўлган. Бу воқеани имом Муслим (162-ҳадис) Анас розияллоҳу анҳудан ривоят қилган.

Иккинчи марта: Расулуллоҳ соллаллоҳу алайҳи ва саллам ўн ёшларида такрорланган. Бу воқеани Абдуллоҳ ибн Аҳмад ибн Ҳанбал роҳимаҳумаллоҳ отасининг “Муснад” китобига ёзган “Қўшимчалар” китобида, Абу Ҳурайра розияллоҳу анҳудан ривоят қилган. Лекин бу ривоят саҳиҳ эмас.

Учинчи марта: Расулуллоҳ соллаллоҳу алайҳи ва салламга ваҳий келишидан олдин содир бўлган. Бу ҳақда Ҳофиз Ибн Ҳажар роҳимаҳуллоҳ шундай деган: “Бу воқеа Расулуллоҳ соллаллоҳу алайҳи ва салламга ваҳий келиш вақтида ҳам такрорлангани собит бўлган. Бу ҳақда Абу Нуайм ўзининг “Далоил” китобида ривоят қилган”.

Тўртинчи марта: Исро ва Меърож кечасида яна бир бор такрорланган. Бу ҳақдаги ҳадисни имом Бухорий (349-ҳадис) ва имом Муслим (163-ҳадис) Абу Зар розияллоҳу анҳудан ривоят қилишган.

Хулоса

Хулоса шуки, сийрат китобларида тўрт марта деб айтилган бу воқеа икки марта: ёшликларида ҳамда Исро ва Меърож кечасида бўлгани саҳиҳ, ўн ёшларида бўлгани заиф, ваҳий келишидан олдин ҳам такрорлангани саҳиҳ ёки заифлигида хилоф бор, валлоҳу аълам.

Шайх Содиқ Самарқандий 1974 йил Самарқанд вилоятида зиёли оилада таваллуд топган. Ўсмирлик йилларидаёқ диний таълим олишга қизиққан. Ўрта мактабни битириб, ҳужраларда диний таълим олган. Ўша даврда водийдаги бир қанча устозлардан таълим олиб, араб тили гарамматикасини мукаммал ўрганган. Шунингдек, турли диний фанлардан бошланғич билимлар олган. Кейинчалик ўз устида шуғулланиб диний таълимини ривожлантирган. Бу орада Имом Бухорий номли Тошкент Ислом маъҳадига ўқишган кирган ва вилоятдаги масжидлардан бирида имом-хатиблик қилган. Сўнг Шайх Муҳаммад Содиқ Муҳаммад Юсуф роҳимаҳуллоҳнинг хос талабаларга берадиган дарсларида қатнашиб, у кишидан таҳсил олган. Шунингдек, бу аснода Тошкентлик машҳур кекса қори Абдулазиз Қоридада роҳимаҳуллоҳга Қуръонни тўлиқ ёддан ўқиб берган. 2003 йилда шайх тақдир тақозоси билан шаръий билимларини ошириш мақсадида Миср Араб Жумҳуриятидаги Ал-Азҳар Университетига ўқишга боради. Университетнинг "Исломий Шариат" факултетини битиради. Мисрдаги илмий фаолияти давомида мисрлик кўплаб шайхларнинг қўлида дарс олади, уларнинг дарсларида қатнашади. Абу Исҳоқ Ҳувайний, Мустафо Адавий, Ториқ Эвазаллоҳ, Ҳасан Ёсир ва бошқалар шулар жумласидандир. Университетда ўқишни битирган Шайх Содиқ Самарқандий бир муддат Мисрда талабаларга турли шаръий фанлардан дарс беради. Ўрта Осиё ва Шарқий Туркистоннинг турли жойларидан келган талабалар шайхдан унумли фойдаланадилар. 2013 йилга келиб шайх Туркияга сафар қилади ва ҳозирга қадар Истанбул шаҳрида яшаб, илмий фаолият юритиб келмоқда, мазҳаблари ҳанафий.

Изоҳ қолдиринг