Ҳомиладор аёлга айтилган талоқ ҳақида

Савол:

Ассаламу алайкум ва рохматуллохи ва барокатуҳ. Шариати исломийяда ҳомиладор аёлга талоқ айтса талоқ тушадими? Мен илгари бидъий талоқ билан уч талоқ айтган эдим. Аммо бир ой ичида яна яшаб кеттик. Уч талоққа йўл истаб, анча қийналдим, анча афсус-надоматлар чекдим. Аммо бир аҳли илм биз билан ва талоқ килинган жойдаги ҳамма гувоҳлар билан суҳбатлашди. Ўшанда аёлим 5-6 ойлик ҳомиладор эди. Демак, талоқ тушмайди, ҳомиладор аёлга деб, қайта никоҳлаб қўйганди. Аммо кейинчалик эшитиб қолдим, ҳомиладор аёлга талоқ тушади, деб… Саволим қуйидагича, ҳомиладор аёлга талоқ тушадими?

Жавоб:

Бисмиллаҳ, алҳамдулиллаҳ, вассолату вассаламу ала Росулиллаҳ. Ва алайкум ассалом ва роҳматуллоҳи ва барокатуҳ!

Аёл кишини талоқ қилиш икки хил бўлади: суннатга мувофиқ ҳамда бидъат, яъни суннатга хилоф талоқ қилиш. Аёл кишининг ҳайзи тугагач, қўшилмасдан бир талоқ қилиш суннат талоқ ҳисобланади. Бидъат талоқ эса икки хил кўринишда бўлади:

Биринчи кўриниш: аёли ҳайз вақтида бўлса ёки ҳайзи тугаб, покланганидан кейин қўшилиб қўйган бўлса, бундай ҳолатда талоқ қилиш бидъат талоқ ҳисобланади.

Иккинчи кўриниш: бир лафз билан уч талоқ қилиш.

Бидъат талоқнинг тушиш ёки тушмаслиги ҳақида қуйидаги фатвога мурожаат қилишингиз мумкин.

Бироқ ҳомиладор аёлни талоқ қилиш суннат талоқ ҳисобланади ва аҳли илмлар ўртасида ҳомиладор аёлга айтилган талоқнинг инобатга олинишида хилоф йўқ, валлоҳу аълам.