Тарк қилинган суннатлар: очиқ чеҳралилик

0

Аллоҳ таолога ҳамду санолар, Пайғамбаримизга салавот ва саломлар бўлсин!

Абу Зар Ғифорий розияллоҳу анҳудан ривоят қилинишича, Расулуллоҳ соллаллоҳу алайҳи ва саллам шундай деганлар: “Биродаринг юзига қараб табассум қилишинг сенинг хайру эҳсонингдир” (Термизий (1956) ривояти).

Имом Муновий роҳимаҳуллоҳ бу ҳадиснинг шарҳида айтадилар: “Биродаринг билан кўришганингда унга очиқ чеҳрали бўлсанг худди хайру эҳсон қилгандек савоб оласан”.
Ибн Баттол роҳимаҳуллоҳ айтадилар: “Ҳадисдан олинадиган фойдалардан бири шуки, инсонларга табассум ва очиқ чеҳра билан муомала қилиш пайғамбарлар хулқларидан бўлиб, бу иш мутакаббирликка барҳам беради ҳамда ўзаро меҳр-муҳаббатни пайдо қилади”.

Жамиятда очиқ чеҳрали одамларнинг кўпайиши инсонларнинг ғам-ташвишларини енгиллатади. Инсон табассум қилиши учун ҳеч қандай муаммоси йўқ, унинг ҳузурида ҳамма нарса маҳайё бўлиши шарт эмас. Расулуллоҳ соллаллоҳу алайҳи ва саллам шунча мусибатларга дучор бўлсалар ҳам, бою камбағал, оқу қора, ёшу қари, барчага доим табассум қилардилар. Бу ҳақда Абдуллоҳ ибн Ҳорис розияллоҳу анҳу шундай дейди: “Мен Расулуллоҳ соллаллоҳу алайҳи ва салламдан кўра очиқ чеҳрали кишини кўрмадим” (Термизий (3641) ривояти). Жарир ибн Абдуллоҳ розияллоҳу анҳу айтадилар: “Мен исломга кирганимдан сўнг Расулуллоҳ соллаллоҳу алайҳи ва саллам ҳузурларига борсам, у киши мени ҳеч ҳам қайтармас, доим менга кулиб қарар эдилар” (Муслим (2475) ривояти).

Келинглар, жамиятимизда очиқ чеҳрали инсонлар сони ортишига ўз ҳиссамизни қўшайлик. Зеро, табассум ва очиқ чеҳралик жамиятда бирлик пайдо бўлиши, кибр, ҳасад ва кўра олмаслик каби иллатлар йўқолишига сабаб бўлади.

Муҳаммад Ҳабибуллоҳ (Акбар Саматов): 1988 йил Самарқанд вилоятида таваллуд топган. Ўрта мактабни тугатганидан сўнг диний илм ўрганиш ниятида Тошкент шаҳридаги Кўкалдош мадрасасига ўқишга кирган. У ерда икки йил таълим олганидан сўнг араб тилини мукаммал ўрганиш мақсадида Миср Араб Республикасига бориб, у ердаги Ал-азҳар университетига ўқишга кирган ва университетнинг Исломий Шариат факултетини тугатган. Бошланғич ва асосий илмини шайх Содиқ Самарқандийдан олган. Шунингдек, Абу Исҳоқ Ҳувайний, Мустафо Адавий, Ториқ Эвазуллоҳ, Ваҳид Абдуссалом Болий, Ҳасан Ёсир каби шайхлардан таълим олган. IxlosOrg саҳифасининг асосчиларидан бири. 2013 йилдан буён Туркияда истиқомат қилиб, даъват ва диний таълим соҳаларида фаолият юритиб келмоқда.

Изоҳ қолдиринг