Бизнинг бу келишувимиз шариатга мувофиқми?

0

Савол:

Мен автомобил эҳтиёт қисмларини сотаман. Бир танишимиз Кореядан автомобиллар учун эҳтиёт қисм жўнатиб туришини, мен бу ерда уларни сотсам фойдадан бир қисмини ажратиб беришини таклиф қилди. Шу савдо тури шариатимизга тўғри келадими?

Жавоб:

Алҳамдулиллаҳ;

Шартномага кўра, танишингиз умумий фойданинг маълум бир қисмини ажратиб бериш шарти билан сизга шерикчиликни таклиф қилган бўлса, бу шартнома шариатимизда музораба дейилади. Унга кўра, шериклардан бири ишга пул тикади (ишга жисмоний кўмаклашиши ҳам мумкин), иккинчи тараф пул тикмай иш билан шуғулланади, фойда эса ўртада келишилган аниқ миқдорга биноан тақсимланади (яъни тенг тақсимланиши шарт эмас). Мазкур шартномага кўра, кўзланган иш амалга ошмаса ва савдо зарар билан якунланса, зиён юз фоиз пул тиккан кишининг зиммасига тушади. Қарши тараф зиён бўлишига сабабчи бўлмаган тақдирда зарарга шерик қилинмайди, фақатгина қилган меҳнатига куяди.

Агар танишингиз юборилган товарлардан сотганингизга яраша ҳар бири учун маълум миқдорда фойда беришини, умумий фойда ёки зарарнинг сизга аҳамияти бўлмаслигини таклиф қилса, унда сиз танишингизга нисбатан ёлланма ишчи саналасиз. Шартномада келишилган ишларни бажарган тақдирингизда келишилган иш ҳақини оласиз. Бу шартномага кўра, танишингиз фойда ёхуд зарар қилиши сизнинг иш ҳаққингизга алоқаси йўқ, валлоҳу аълам.

Танбеҳ: ҳар иккала савдо турининг қай бирига амал қилинган тақдирда ҳам шартномада сиз олишингиз керак бўлган фойда аниқ белгиланиши лозим.

Муҳаммад Ҳабибуллоҳ (Акбар Саматов): 1988 йил Самарқанд вилоятида таваллуд топган. Ўрта мактабни тугатганидан сўнг диний илм ўрганиш ниятида Тошкент шаҳридаги Кўкалдош мадрасасига ўқишга кирган. У ерда икки йил таълим олганидан сўнг араб тилини мукаммал ўрганиш мақсадида Миср Араб Республикасига бориб, у ердаги Ал-азҳар университетига ўқишга кирган ва университетнинг Исломий Шариат факултетини тугатган. Бошланғич ва асосий илмини шайх Содиқ Самарқандийдан олган. Шунингдек, Абу Исҳоқ Ҳувайний, Мустафо Адавий, Ториқ Эвазуллоҳ, Ваҳид Абдуссалом Болий, Ҳасан Ёсир каби шайхлардан таълим олган. IxlosOrg саҳифасининг асосчиларидан бири. 2013 йилдан буён Туркияда истиқомат қилиб, даъват ва диний таълим соҳаларида фаолият юритиб келмоқда.

Изоҳ қолдиринг