Пайғамбаримиз намозларининг кўриниши (7)

0

Саксон олтинчи ҳадис

 

عَنْ ثَابِتٍ الْبُنَانِيِّ عَنْ أَنَسِ بْنِ مَالِكٍ – رضي الله عنه – قَالَ: ((إنِّي لا آلُو أَنْ أُصَلِّيَ بِكُمْ كَمَا كَانَ رَسُولُ اللَّهِ – صلى الله عليه وسلم – يُصَلِّي بِنَا قَالَ ثَابِتٌ فَكَانَ أَنَسٌ يَصْنَعُ شَيْئاً لا أَرَاكُمْ تَصْنَعُونَهُ. كَانَ إذَا رَفَعَ رَأْسَهُ مِنْ الرُّكُوعِ: انْتَصَبَ قَائِماً , حَتَّى يَقُولَ الْقَائِلُ: قَدْ نَسِيَ , وَإِذَا رَفَعَ رَأْسَهُ مِنْ السَّجْدَةِ: مَكَثَ , حَتَّى يَقُولَ الْقَائِلُ: قَدْ نَسِيَ)) .

Собит Буноний роҳимаҳуллоҳ Анас розияллоҳу анҳудан ривоят қилиб айтади: “Набий соллаллоҳу алайҳи ва саллам бизга қандай намоз ўқиб берган бўлсалар, мен ҳам сизларга худди шундай кўринишда намоз ўқиб бераман”.

Собит айтади: “Анас (намозда) сизлар қилмайдиган бир ишни қилар эди. У рукудан бош кўтаргач, қаддини ростлаб узоқ турар, ҳатто, буни кўрган киши, (сажда қилиш кераклиги) эсидан чиқиб кетди-ёв, деб ўйлаб қоларди. Шунингдек, саждадан бош кўтаргач, (икки сажда орасида) узоқ ўтирар, ҳатто, буни кўрган киши, (иккинчи саждага бориш) эсидан чиқиб кетди-ёв, деб ўйлаб қоларди[Бухорий: 800 ва Муслим: 472].

Шарҳ:

Анас розияллоҳу анҳу айтади: “Набий соллаллоҳу алайҳи ва саллам бизга қандай намоз ўқиб берган бўлсалар, мен ҳам сизларга худди шу тарзда, ҳеч камайтирмаган ҳолда намоз ўқиб беришга ҳаракат қиламан. Тоинки сизлар ҳам буни кўриб, худди шундай намоз ўқинглар”.

Ҳадис ровийси Собит Буноний айтади: “Анас розияллоҳу анҳу намозни мукаммал ва чиройли адо қилиш учун айрим амаллар қилар эдики, сизлар бу амални қилганингизни ҳали кўрмадим. У рукудан кейин узоқ муддат тик турар, шунингдек, саждадан бош кўтаргандан кейин (икки сажда орасида) ҳам узоқ муддат ўтирар эди.

Рукудан қад ростлаганидан сўнг анча вақт туриб қолар, ҳатто қиёмда узоқ турганини кўрган одам: “Руку билан сажда ўртасидаги қиёмда тургани ёдидан кўтарилди шекилли”, деб ўйлаб қоларди. Шунингдек, саждадан бош кўтаргач, (икки сажда ўртасида) узоқ муддат ўтирганидан, буни кўрган одам: “Иккинчи саждага бориш ёдидан кўтарилди шекилли”, деб ўйлаб қоларди”.

Ҳадисдан олинадиган фойда:

Рукудан бош кўтаргач, узоқ муддат қиёмда туриш ҳамда саждадан кейин (яъни икки сажда орасида) узоқ муддат ўтириш жоиз. Зеро, Набий соллаллоҳу алайҳи ва саллам шундай намоз ўқиганлар.

Изоҳ қолдиринг