Уйни тоза тутиш бараками?

0

Савол:

Халқимизда «Уйни тоза тут, барака бўлади» деган гап бор. Шунга шариатда бирон асос борми?

Жавоб:

Алҳамдулиллаҳ.

Умуман олганда бирон миллатга оид мақол, урф-одат, ҳикматли сўзлар шариатга зид бўлмаса, қабул қилинади. Барака дегани яхшиликнинг кўпайиши дегани. Баракани Аллоҳ беради. Аллоҳга иймон келтириш, солиҳ амаллар қилиш, умуман олганда Аллоҳ буюрган ишларни қилиб, қайтарган ишлардан тийилиш чинакам барака сабабларидир. Аллоҳ таоло айтади: «Агар у қишлоқларнинг (жойнинг) аҳолиси иймон келтириб, тақводор бўлганларида эди, албатта Биз уларга осмону ердан баракалар (дарвозаларини) очиб қўйган бўлур эдик» (Аъроф: 96).

Албатта инсон тоза-озодалик, саранжом-саришталикка риоя қилиши, бадани, либоси ва уй-жойининг озодалигига эътибор қаратиши шариатимиз буюрган ишлардан саналади. Бунга Расулуллоҳ соллаллоҳу алайҳи ва салламнинг таҳорат, ғусл ва мисвок қилиш – тишларни тозалашга тарғиб қилган бир қанча ҳадислари яққол далил бўлади.

Бинобарин, юқоридаги сўз тўғри ва ҳақдир. Зеро, инсоният хилқатан тоза-озодалик ва саранжом-саришталикни яхши кўради, чиройли манзарани кўрса кайфияти кўтарилади, қалбига сурур киради. Шунинг учун уй бекалари хонадон тозалигига эътибор қаратишлари лозим. Ишдан ҳориб уйига қайтган эр тоза ва тартибли уйига кириб қалбига шодлик киради, роҳатланади, турмуш ўртоғидан рози бўлади, унга бўлган муҳаббати ортади. Аксинча,  уйининг бетартиб ва исқирт ҳолатини кўрган эрнинг кайфияти бузилади, аёлидан кўнгли совуйди ва натижада хонадонда уруш-жанжал ва келишмовчиликлар келиб чиқади. Баъзи ҳолатларда қайнона-келин ўртасидаги келишмовчиликларга ҳам келиннинг тозаликка эътиборсизлиги сабаб бўлади. Буларнинг барчаси юқоридаги сўзнинг тўғрилигини кўрсатади. Зеро, хушкайфиятлик, меҳр-муҳаббатлилик ва осойишталик барака самараларидир.

Агар юқоридаги сўздан моддий саранжом-саришталикка қўшимча маънавий поклик ҳам назарда тутилган бўлса, унда бу иш том маънода барака сабабига айланади. Уй эгалари иймон-эътиқодли, ҳалол-покиза бўлишса, бундай хонадонда албатта хайр-барака бўлади, валлоҳу аълам.

Изоҳ қолдиринг